Папа прызначыў былога нелегальнага мігранта з Сальвадора кіраваць дыяцэзіяй у Заходняй Вірджыніі
Эвеліа Менхівар-Аяла ўжо крытыкаваў антыміграцыйную палітыку ЗША.
Папа Леў XIV прызначыў кіраўніком дыяцэзіі Уілінга-Чарлстона ў штаце Заходняя Вірджынія біскупа Эвеліа Менхівара-Аяла — выхадца з Сальвадора, які ў маладосці некалькі разоў нелегальна спрабаваў трапіць у ЗША, піша Fox News.
Гісторыя яго міграцыі нетрывіяльная. Падлеткам ён уцякаў з ахопленай партызанскай вайной краіны — і кожны раз яго затрымлівалі. Першы раз мексіканскія ўлады дэпартавалі яго ў Гватэмалу. Другая спроба — праз гватэмальскія джунглі — скончылася тым, што ён вярнуўся дадому сам. Трэцяя завяла яго ў мексіканскую турму, адкуль яго вызвалілі толькі пасля хабару. Урэшце ў ЗША яго правёз пажылы амерыканец — Менхівар-Аяла і яшчэ трое схаваліся ў багажніку яго аўтамабіля на памежным пункце Сан-Ісідра.
У Амерыцы ён пачынаў з прыбіральшчыка на складзе UPS у Мэрылендзе, потым стаў моладзевым міністрам і атрымаў від на жыхарства. Біскупам Менхівар-Аяла стаў значна пазней.
Прызначэнне выклікала шырокае абмеркаванне — перш за ўсё праз палітычны кантэкст. Новы біскуп публічна крытыкаваў антыміграцыйную палітыку адміністрацыі Трампа: у 2025 годзе ён апублікаваў артыкул у Catholic Standard, у якім параўнаў становішча мігрантаў з пакутамі Хрыста і назваў некаторыя дзеянні ўладаў «парушэннем асноватворных правоў чалавека».
Адносіны паміж Ватыканам і Белым домам і без таго напружаныя. Леў XIV ужо паспеў асудзіць вайну на Блізкім Усходзе і падтрымаць амерыканскіх біскупаў, якія крытыкавалі дэпартацыі. Трамп у адказ назваў Папу «слабым у пытаннях злачыннасці і знешняй палітыкі», хоць і дадаў, што «не мае нічога супраць» яго асабіста і мае права не пагаджацца.
Цяпер чытаюць
У мінскім заапарку правядуць фестываль агню. Кажуць, што жывёлы будуць у памяшканнях, таму ўсё нармальна1
Каментары