У гадзіны, што папярэднічалі навіне пра двухтыднёвае перамір’е паміж Іранам і ЗША, першыя асцярожныя надзеі з’явіліся дзякуючы Пакістану, піша Бі-бі-сі.
Крыніца ў Ісламабадзе на ўмовах ананімнасці паведаміла Бі-бі-сі, што перамовы вяліся «дынамічна», а Пакістан выступаў пасярэднікам паміж Іранам і ЗША. Перамовы з боку гэтай краіны вялі «вельмі вузкае кола асоб». Удзельнікі апісвалі атмасферу як «змрочную і сур’ёзную, але з надзеяй на спыненне баявых дзеянняў».
На працягу апошніх некалькіх тыдняў Пакістан працаваў пасярэднікам паміж Іранам і ЗША, перадаючы паведамленні ад аднаго боку іншаму. Краіна мае даўнія сувязі з Іранам, агульную мяжу і рэгулярна называе адносіны з суседам «брацкімі».
Што да адносін з ЗША, прэзідэнт Трамп назваў кіраўніка ўзброеных сіл Пакістана фельдмаршала Асіма Муніра сваім «любімым» фельдмаршалам і адзначыў, што той ведае Іран «лепш за многіх».
Пакістан разам з Ізраілем і ЗША з’яўляецца афіцыйна прызнанай ядзернай дзяржавай і ўваходзіць у «ядзерны клуб».
Дасягненне пагаднення заставалася пад пытаннем. Выступаючы ў парламенце ў аўторак увечары, міністр замежных спраў Пакістана Ісхак Дар адзначыў: «Да ўчорашняга дня мы мелі вялікі аптымізм адносна пазітыўнага развіцця падзей», — гэта было яшчэ да таго, як у панядзелак Ізраіль атакаваў Іран, а Іран нанёс удар па Саудаўскай Аравіі.
Паводле яго слоў, Пакістан «усё яшчэ спрабаваў максімальна ўрэгуляваць сітуацыю».
Фельдмаршал Мунір выказаўся яшчэ больш крытычна. Падчас размовы з вайсковымі чыноўнікамі ў аўторак ён заявіў, што напад на Саудаўскую Аравію «псуе шчырыя намаганні па мірным вырашэнні канфлікту».
Гэта была, магчыма, самая жорсткая рыторыка Пакістана ў дачыненні да Ірана з пачатку супрацьстаяння.
Некаторыя аналітыкі дапусцілі, што гэта можа ўзмацніць ціск на Тэгеран. Пакістан мае абарончы пакт з Саудаўскай Аравіяй, і хоць Эр-Рыяд неаднаразова падвяргаўся атакам, Пакістан пакуль не задзейнічаў умовы гэтага пагаднення.
Пасля 00:00 па пакістанскім часе прэм’ер-міністр краіны Шахбаз Шарыф напісаў у X, што «дыпламатычныя намаганні… упэўнена і моцна прасоўваюцца, што дае надзею на істотныя вынікі ўжо найбліжэйшым часам».
Ён таксама заклікаў прэзідэнта Трампа падоўжыць крайні тэрмін на два тыдні, а Іран — на гэты ж перыяд адкрыць Армузскі праліў.
Амбасадар Ірана ў Пакістане Рэза Аміры Магадам каля 03:00 па мясцовым часе паведаміў у X, што бакі зрабілі «крок наперад, пераадолеўшы крытычную і адчувальную стадыю».
Крыху раней за 05:00 прэм’ер-міністр Пакістана Шахбаз Шарыф абвясціў пра дасягненне дамоўленасці аб спыненні агню і запрасіў абодва бакі сустрэцца ў Ісламабадзе ў пятніцу, 10 красавіка, для «далейшых перамоваў дзеля канчатковага пагаднення».
«Мы ўсё яшчэ захоўваем вялікую асцярожнасць», — паведаміла крыніца ў Пакістане Бі-бі-сі, падкрэсліўшы «працяглую крохкасць» сітуацыі.
Паміж бакамі дагэтуль няма даверу, а іх пазіцыі застаюцца жорсткімі і непахіснымі.
Хоць Пакістан і можа пасадзіць абодвух апанентаў за стол перамоў, галоўным пытаннем застаецца, ці змогуць яны знайсці пункты судакранання для канчатковага пагаднення.
Цяпер чытаюць
Чацвёртую лінію мінскага метро павядуць у Дражню. А «Сляпянка» і «Даўгабродская» змянілі сваё месца2
Каментары