У Бярозаўскім раёне мужчына з нажом напаў на супрацоўнікаў міліцыі, у выніку чаго тыя ўжылі табельную зброю, паведамляе УУС Брэсцкага аблвыканкама.
Паведамляецца, што ў міліцыю паступіла ананімнае паведамленне з просьбай праверыць інфармацыю па адной з вёсак раёна. На месца выехаў патруль. Калі сілавікі прыбылі, 34‑гадовы мясцовы жыхар з прыкметамі алкагольнага ап’янення, трымаючы ў руках нож, пачаў набліжацца да іх.
На патрабаванні спыніцца і кінуць нож мужчына, як сцвярджаецца, не рэагаваў, таму адзін з супрацоўнікаў зрабіў прыцэльны стрэл у нагу нападніку.
Пацярпеламу аказалі першую медыцынскую дапамогу і перадалі брыгадзе хуткай дапамогі.
Паводле факту здарэння распачалі крымінальную справу за гвалт або пагрозу яго прымянення ў дачыненні да супрацоўніка органаў унутраных спраў. Мужчыну пагражае да сямі гадоў пазбаўлення волі.
Каментары