ЗША і краіны Еўропы падрыхтавалі прапановы плана падтрымкі Украіны пасля вайны
Упершыню за некалькі месяцаў еўрапейскія чыноўнікі заявілі пра добрую супрацу з амерыканскімі перамоўшчыкамі.
Амерыканскія і еўрапейскія перамоўшчыкі распрацавалі праекты двух дакументаў падтрымкі Украіны пасля патэнцыйнага дасягнення «мірнага пагаднення», піша The New York Times са спасылкай на крыніцы.
Выданне адзначае, што ўпершыню за некалькі месяцаў еўрапейскія чыноўнікі заявілі пра добрую супрацу з амерыканскімі перамоўшчыкамі.
NYT піша, што амерыканскія і еўрапейскія чыноўнікі адзначылі: праекты дакументаў па пытаннях бяспекі былі апрацаваныя падчас больш як васьмі гадзін інтэнсіўных дыскусій з прэзідэнтам Украіны Уладзімірам Зяленскім і іншымі прадстаўнікамі Украіны ў Берліне ў нядзелю і панядзелак. У перамовах бралі ўдзел кіраўнікі і службовыя асобы па пытаннях нацыянальнай бяспекі з каля дзясятка еўрапейскіх краін, у тым ліку Францыі, Германіі, Італіі і Вялікабрытаніі.
Адзін з праектаў дакументаў выкладае агульныя прынцыпы. Паводле слоў двух амерыканскіх чыноўнікаў і некалькіх еўрапейскіх дыпламатаў, гэта з’яўляецца абавязацельствам, падобным да гарантый артыкула 5 НАТА, згодна з якім усе краіны-члены абавязваюцца аказаць дапамогу любой краіне, што падверглася нападу.
Іншая частка пагаднення, якую амерыканскія чыноўнікі назвалі «аператыўным дакументам паміж вайскоўцамі», утрымлівае больш падрабязную інфармацыю. У ёй тлумачыцца, як амерыканскія і еўрапейскія сілы будуць супрацоўнічаць з украінскімі вайсковымі, каб гарантаваць, што Расія не паспрабуе зноў захапіць украінскую тэрыторыю ў бліжэйшыя гады. NYT дадае, што ніводзін з праектаў дакументаў не быў апублікаваны.
«Асобы, знаёмыя з імі, заявілі, што аператыўны праект дакумента змяшчае шматлікія канкрэтныя ўказанні, прызначаныя супакоіць Украіну ў розных сцэнарыях магчымай агрэсіі Расіі. Адзін амерыканскі чыноўнік, які размаўляў з журналістамі на ўмовах ананімнасці, заявіў, што дакумент з’яўляецца «вельмі канкрэтным» у тым, як прадухіляць далейшыя ўварванні і караць Расію, калі яны адбудуцца».
Паводле звестак выдання, першачарговай задачай з’яўляецца план давядзення колькасці Узброеных сіл Украіны да «мірнага ўзроўню» ў 800 000 вайскоўцаў з сучасным абсталяваннем і падрыхтоўкай, каб яны былі «магутным фактарам стрымлівання для Расіі».
Стварэнне такіх узброеных сіл запатрабуе «пастаяннай і значнай падтрымкі» Украіны, гаворыцца ў сумеснай заяве лідараў 10 еўрапейскіх краін і высокапастаўленых чыноўнікаў Еўрапейскага Саюза.
У праекце дакумента таксама пазначаныя дэталі адносна вайсковых сіл пад кіраўніцтвам Еўропы, якія будуць дапамагаць Украіне, дзейнічаючы ўнутры краіны для забеспячэння бяспекі паветранай і марской прасторы.
Чыноўнікі адмовіліся паведамляць канкрэтныя звесткі пра тое, якія краіны размесцяць войскі ва Украіне, аднак Зяленскі заявіў у аўторак, што некалькі краін у прыватным парадку паабяцалі гэта зрабіць.
Чакаецца, што гэтыя войскі будуць размешчаныя на захадзе Украіны, далёка ад лініі фронту, і будуць служыць дадатковым сродкам стрымлівання любой будучай агрэсіі з боку Расіі.
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе1010
Каментары