Учора шырока разышоўся каментарый прэс-сакратара МЗС Польшчы Мацея Вэвюра пра тое, што Анджэй Пачобут адмовіўся звяртацца да Лукашэнкі з просьбай аб вызваленні, і таму яго не вызвалілі. Пазней Вэвюр сказаў, што яго не так зразумелі.
Палітвязню Анджэю Пачобуту прапаноўвалі напісаць просьбу аб вызваленні, аднак ён адмовіўся, бо не жадае звяртацца да Аляксандра Лукашэнкі. Пра гэта заявіў прэс-сакратар МЗС Польшчы Мацей Вэвюр.
Пазней у размове з TVN24 Вэвюр удкладніў, што яго няправільна зразумелі: ён гаварыў пра сітуацыю, што была шмат гадоў таму, а не цяперашнюю.
— Некалькі гадоў таму была сітуацыя, што Анджэй Пачобут атрымаў такую прапанову, але ёй не скарыстаўся. Цяпер я не ведаю, ці была такая прапанова. Не буду спекуляваць, — удакладніў Вэвюр.
МЗС Польшчы таксама апублікавала кароткае паведамленне ў сетках, дзе гаворыцца, што разам з партнёрамі МЗС працягвае дзейнічаць на карысць вызвалення Анджэя Пачобута.
Былая кіраўніца Саюза палякаў у Беларусі Анжэліка Борыс на сваёй старонцы ў фэйсбуку заявіла, што Пачобуту ніхто ніколі нічога не прапаноўваў за ўсе гэтыя гады.
— Анджэю ніхто ніколі нічога не прапаноўваў за ўсе гэтыя гады, каб пісаць якія-небудзь прашэнні аб памілаванні, не было таксама і размовы пра яго выезд з Беларусі. На пачатку мы з Анджэем тады адмовіліся ад выезду, потым не было ніякіх прапаноў, проста Анджэй не быў у спісе беларускай апазіцыі, бо з'яўляецца прадстаўніком польскай меншасці, — напісала яна.
Дарадца Ціханоўскай Франак Вячорка адказаў тады на словы Борыс:
«Анджэй Пачобут быў у кожным нашым спісе, і агульных і прафесійных. І мы, і саюзнікі, і ЗША, а ў першую чаргу Польшча і польскі ўрад — біліся за Пачобута.
Праблема на баку Лукашэнкі, які не хоча Пачобута выпускаць».
Каментары
Па-беларуску лепш казаць Андрусь. Таму Андрэй, Анджэй альбо Аганафел — якая розьніца?