Кіраўніка Аб'яднанай грамадзянскай партыі Мікалая Казлова асудзілі двойчы, другі раз — на 2,5 гады па «народным» 342 артыкуле КК РБ. Ён выйшаў на волю ў ліпені 2024‑га і гэтай восенню выехаў з Беларусі праз пагрозы арышту. Цяпер для яго падтрымкі абвясцілі збор на платформе «Байсол».
Мікалай Казлоў — кіраўнік Аб'яднанай грамадзянскай партыі. Яшчэ ў 2008 годзе ён пакінуў службу ў крымінальным вышуку (прапрацаваўшы там 17 гадоў) і ўступіў у АГП. А ў 2018‑м стаў яе старшынёй.
У 2020 годзе палітык стаў даверанай асобай Святланы Ціханоўскай. За гэта яго двойчы саджалі — у 2021 і 2022 гадах. Другі раз прысудзілі да 2,5 гадоў пазбаўлення волі. Амаль увесь тэрмін ён правёў у ізаляцыі без сувязі са знешнім светам, без перадач, без медыцынскай дапамогі і без элементарных умоў.
Пасля вызвалення амаль год заставаўся ў Беларусі, спадзеючыся на спакойнае жыццё. Але пастаяннае назіранне і пагроза новага арышту прымусілі Мікалая з'ехаць. Цяпер ён знаходзіцца ў Бельгіі, дзе запытаў абарону.
Колькі часу будзе доўжыцца працэдура, невядома. Але ўвесь гэты час у Казлова не будзе ні магчымасці працаваць, ні фінансавай падтрымкі. Для Мікалая гэта даволі крытычна. Два гады ў турме моцна сапсавалі здароўе: у мужчыны ярка выяўленая арытмія, гіпертанія, хранічная бессань. За час у зняволенні пагоршыўся зрок і слых. Але самая цяжкая праблема — зубы. У калоніі ён страціў іх амаль усе, і цяпер не можа нармальна есці, гаварыць і ўсміхацца. Каб зрабіць пратэзы, палітык звярнуўся ў розныя ініцыятывы па падтрымку.
Але дапамога з імплантамі — гэта яшчэ не ўсё. Трэба вырашыць і іншыя праблемы са здароўем. Усё ўскладняецца тым, што зараз Мікалай пачынае жыццё з нуля. Ахвяраванні дапамогуць аплаціць базавыя выдаткі на жыллё і харчаванне, а таксама лекі.
«Пасля вызвалення я амаль год заставаўся ў Беларусі, не хацеў з'язджаць — гэта мая краіна. Пакуль сядзеў, памерла мама. Не тое, што на пахаванне не адпусцілі — нават тэлеграму не перадалі, якую яна мне выслала напярэдадні сваёй смерці. Даведаўся ўжо пазней, пасля пахавання. Я не гатовы ім гэта дараваць. І краіну аддаць не гатовы. Так што планую працягнуць барацьбу. Але на першы час мне вельмі патрэбная падтрымка. Калі ў вас ёсць магчымасць, я быў бы вельмі ўдзячны за дапамогу», — кажа Мікалай.
Сума збору — €4000.
€2500 — арэнда жылля на некалькі месяцаў
€1500 — бытавыя выдаткі, лекі і ежа.
Падтрымаць Мікалая Казлова можна па спасылцы.
Цяпер чытаюць
Сталі вядомыя падрабязнасці пра трагедыю ў Полацкім манастыры8
Сталі вядомыя падрабязнасці пра трагедыю ў Полацкім манастыры
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары