Kiraŭnika Abjadnanaj hramadzianskaj partyi Mikałaja Kazłova asudzili dvojčy, druhi raz — na 2,5 hady pa «narodnym» 342 artykule KK RB. Jon vyjšaŭ na volu ŭ lipieni 2024‑ha i hetaj vosieńniu vyjechaŭ ź Biełarusi praz pahrozy aryštu. Ciapier dla jaho padtrymki abviaścili zbor na płatformie «Bajsoł».
Mikałaj Kazłoŭ — kiraŭnik Abjadnanaj hramadzianskaj partyi. Jašče ŭ 2008 hodzie jon pakinuŭ słužbu ŭ kryminalnym vyšuku (prapracavaŭšy tam 17 hadoŭ) i ŭstupiŭ u AHP. A ŭ 2018‑m staŭ jaje staršynioj.
U 2020 hodzie palityk staŭ davieranaj asobaj Śviatłany Cichanoŭskaj. Za heta jaho dvojčy sadžali — u 2021 i 2022 hadach. Druhi raz prysudzili da 2,5 hadoŭ pazbaŭleńnia voli. Amal uvieś termin jon pravioŭ u izalacyi biez suviazi sa źniešnim śvietam, bieź pieradač, bieź miedycynskaj dapamohi i biez elemientarnych umoŭ.
Paśla vyzvaleńnia amal hod zastavaŭsia ŭ Biełarusi, spadziejučysia na spakojnaje žyćcio. Ale pastajannaje nazirańnie i pahroza novaha aryštu prymusili Mikałaja źjechać. Ciapier jon znachodzicca ŭ Bielhii, dzie zapytaŭ abaronu.
Kolki času budzie doŭžycca pracedura, nieviadoma. Ale ŭvieś hety čas u Kazłova nie budzie ni mahčymaści pracavać, ni finansavaj padtrymki. Dla Mikałaja heta davoli krytyčna. Dva hady ŭ turmie mocna sapsavali zdaroŭje: u mužčyny jarka vyjaŭlenaja arytmija, hipiertanija, chraničnaja biessań. Za čas u źniavoleńni pahoršyŭsia zrok i słych. Ale samaja ciažkaja prablema — zuby. U kałonii jon straciŭ ich amal usie, i ciapier nie moža narmalna jeści, havaryć i ŭśmichacca. Kab zrabić pratezy, palityk źviarnuŭsia ŭ roznyja inicyjatyvy pa padtrymku.
Ale dapamoha ź impłantami — heta jašče nie ŭsio. Treba vyrašyć i inšyja prablemy sa zdaroŭjem. Usio ŭskładniajecca tym, što zaraz Mikałaj pačynaje žyćcio z nula. Achviaravańni dapamohuć apłacić bazavyja vydatki na žyllo i charčavańnie, a taksama leki.
«Paśla vyzvaleńnia ja amal hod zastavaŭsia ŭ Biełarusi, nie chacieŭ źjazdžać — heta maja kraina. Pakul siadzieŭ, pamierła mama. Nie toje, što na pachavańnie nie adpuścili — navat telehramu nie pieradali, jakuju jana mnie vysłała napiaredadni svajoj śmierci. Daviedaŭsia ŭžo paźniej, paśla pachavańnia. Ja nie hatovy im heta daravać. I krainu addać nie hatovy. Tak što płanuju praciahnuć baraćbu. Ale na pieršy čas mnie vielmi patrebnaja padtrymka. Kali ŭ vas jość mahčymaść, ja byŭ by vielmi ŭdziačny za dapamohu», — kaža Mikałaj.
Suma zboru — €4000.
€2500 — arenda žylla na niekalki miesiacaŭ
€1500 — bytavyja vydatki, leki i ježa.
Kamientary