Памёр бізнэсмен з 90-х Аляксандр Сманцар. Гэта ён у 2010 званіў Статкевічу на Плошчу і заклікаў «сядаць у крэсла Сідорскага»
Здарылася гэта яшчэ 28 лютага, але вядома стала толькі цяпер. Пра смерць Сманцара паведаміў кіраўнік Tribuna.com Максім Беразінскі.
Прычына смерці невядомая.
«Менавіта з яго пачалася эра, калі дзяржава пачала адціскаць прыватную ўласнасць, а бізнэсменаў садзіць. Ён быў небяспечны вораг для Лукашэнкі — і таму менавіта з яго пачалі.
Так, у той лазні, пасля якой зніклі Ганчар і Красоўскі, таксама павінен быў быць Сманцар. Ён прымаў актыўны ўдзел у палітычным жыцці краіны, а гэта ўжо тады было недапушчальна», — напісаў пра бізнесмена Беразінскі.
У 1990-х гадах значная частка гандлю з Расіяй праходзіла праз Аляксандра Сманцара. Ён валодаў некалькімі банкамі, заводам маргарыну. Раней яму таксама належаў кантрольны пакет акцый футбольнага мінскага «Дынама».
У 2002 годзе супраць Сманцара была заведзеная крымінальная справа за незаконную прадпрымальніцкую дзейнасць, звязаную з БМЗ. Органы ацанілі прычыненую шкоду ў 84 мільёны даляраў. Сманцар быў прысуджаны да двух гадоў пазбаўлення волі. Затым судовыя рашэнні некалькі разоў пераглядаліся.
Пасля выхаду на волю бізнэсмен пакінуў Беларусь. З 2006 года ў роднай краіне ён ні разу не быў, пісала Tribuna.
Гэта ён у 2010 году званіў падчас Плошчы Міколе Статкевічу і заклікаў «сядаць у крэсла прэм'ера Сідорскага».
У 2017 годзе БТ выпусціла прапагандысцкі сюжэт пра Мікалая Статкевіча, які цяпер знаходзіцца за кратамі. У ім сцвярджалася, што паміж Статкевічам і Сманцарам была размова — бізнэсмен нібыта фінансаваў пратэсты «недармаедаў».
Цяпер чытаюць
У беларускі ў Італіі забралі двух сыноў — бо яна не прызнавала дзяржаву і не адпускала дзяцей у школу і да доктара6
Каментары