Кіраўніца дыпламатыі ЕС Кая Калас Euronews заявіла, што Расія не прымусіць Украіну капітуляваць праз здзелку з ЗША, і падкрэсліла, што Еўропа працягне падтрымліваць Украіну і аказваць ціск на Маскву.
Вярхоўная прадстаўніца ЕС па замежных справах і палітыцы бяспекі сказала, што Расія пралічылася, паспрабаваўшы прымусіць Украіну здацца праз дамоўленасці са ЗША, пачынаючы з леташняга саміту ў Анкорыджы.
«Расіяне хочуць абмяркоўваць і весці перамовы са ЗША, каб менавіта Вашынгтон забяспечыў ім жаданы вынік. Але ў нас ёсць свае патрабаванні да Расіі, — сказала яна. — Пасланне такое: вам трэба размаўляць з еўрапейцамі».
Адказваючы на пытанне пра здзелку па дызельным паліве і энергетычнае перамір'е, абвешчаныя прэзідэнтам ЗША Дональдам Трампам, паводле якіх Расія паставіць 300 тысяч тон дызельнага паліва ў Злучаныя Штаты і на сусветныя рынкі, Калас назвала гэтую схему відавочным падарункам прэзідэнту РФ Пуціну.
«Пытанне ў тым, што ён атрымаў узамен. Мы бачым, што ён насамрэч узмацняе ўдары па мірным насельніцтве і грамадзянскай інфраструктуры. Абвешчанае энергетычнае перамір'е з расійскага боку не працуе», — падкрэсліла яна.
Паводле Калас, ключавое пытанне ў тым, што Расія павінна спыніць агрэсіўную вайну, і тады спыняцца і ўкраінскія ўдары па расійскіх нафтаперапрацоўчых заводах.
«Калі паглядзець шырэй, большая частка фінансавання гэтай вайны паступае ад нафты. Таму Украіна наносіць удары па гэтых аб'ектах, а Расія б'е па энергетычнай інфраструктуры ва Украіне, імкнучыся прычыніць як мага больш пакут украінцам у будучую зіму», — сказала яна.
Калас зноў падкрэсліла, што міжнародны ціск трэба аказваць на агрэсара, каб ён спыніў вайну, а не на ахвяру, каб яна капітулявала. Менавіта такой пазіцыі, паводле яе слоў, Еўропа нязменна прытрымліваецца.
«Калі б мы дзейнічалі разам са ЗША, сігнал для Расіі быў бы адназначным: спыніце гэтую вайну — і ўсе вашы праблемы з нафтаперапрацоўчымі заводамі ды іншымі аб'ектамі таксама знікнуць», — заявіла яна.
На пытанне, ці азначае серыя выбараў у ключавых краінах ЕС, у тым ліку магчымае абранне Марын Ле Пен прэзідэнткай Францыі, аслабленне падтрымкі Украіны, Калас прызнала, што за чатыры гады вайны грамадскія настроі змяніліся.
Тым не менш, паводле яе слоў, Еўропе неабходна выступаць адзіным фронтам, інакш яе знешняя палітыка не будзе эфектыўнай.
«Менавіта на гэта, па сутнасці, і разлічваюць расіяне: што еўрапейцы стомяцца, і тады яны атрымаюць тое, чаго дамагаюцца. І я хачу падкрэсліць: тады іх апетыты толькі вырастуць», — сказала Калас.
Цяпер чытаюць
Беларускія рэпетытары ў паніцы: праз праблемы «Яндэкса» яны могуць згубіць матэрыялы, якія напрацоўвалі гадамі8
Каментары