У Беларусі з 4 па 17 жніўня праходзіць прафілактычная праверка ўчасткаў чыгункі з-за павелічэння выпадкаў парушэння правілаў бяспекі, паведаміла прэс-служба МУС.
Як паведамілі ў МУС, толькі за першае паўгоддзе было зафіксавана 18 парушэнняў, што стваралі пагрозу для бяспечнага руху цягнікоў — напрыклад, разбітыя шыбы, староннія прадметы на рэйках або пашкоджанне сігнальнага абсталявання. А ў ліпені колькасць такіх выпадкаў павялічылася яшчэ на 11.
Найчасцей такія парушэнні здзяйсняюць непаўналетнія, якія не ўсведамляюць, што іх «жарты» могуць прывесці да трагедыі.
У адным з інцыдэнтаў машыніст цягніка Мінск—Гудагай заўважыў камяні на рэйках і неадкладна паведаміў пра гэта дзяжурнаму. Пазней падобная сітуацыя паўтарылася перад цягніком Мінск—Гродна: супрацоўнікі міліцыі знайшлі школьнікаў, якія раскладвалі на пуцях шчэбень.
Як адзначыў начальнік упраўлення грамадскай бяспекі на аб'ектах транспарту МУС Генадзь Ворса, летам дзеці часта застаюцца без нагляду дарослых, што і прыводзіць да падобных інцыдэнтаў.
Сачыць за сітуацыяй на чыгунцы цяпер будуць супрацоўнікі міліцыі, чыгуначнікі і добраахвотныя дружыны.
Каментары