Як насамрэч збіралі некаторых людзей на таемную інаўгурацыю ў 2020-м? Расказвае Лойка
«Гэтым людзям сказалі апрануцца ўрачыста, іх проста выклікалі на нараду ў каляпрофільнае міністэрства».
Абмяркоўваючы ў новым аналітычным выпуску ТОКу прызнанне беларускага бізнэсоўца Аляксандра Машэнскага непажаданай асобай у Польшчы, Наста Роўда згадала яго ўдзел у «таемнай інаўгурацыі» Лукашэнкі ў 2020 годзе.
Эканамічная аглядальніца Вольга Лойка заўважыла, што яшчэ ў 2020-м цікавілася ў людзей, якія там прысутнічалі, як яны туды былі запрошаны.
«Гісторыя выявілася забаўнай. Думаю, што яна распаўсюджваецца на ўсіх удзельнікаў».
Сёстры Груздзевы, якія таксама былі на інаўгурацыі, расказвалі раней, што не ведалі, куды едуць, ім толькі сказалі ўрачыста апрануцца.
Аказалася, не толькі ім. Вольга Лойка згадвае словы сваіх суразмоўцаў:
«Гэтым людзям сказалі апрануцца ўрачыста, іх проста выклікалі на нараду ў каляпрофільнае міністэрства. Там сказалі здаць тэлефон, пасадзілі ў аўтобус».
Як адзначае аналітык, яе суразмоўцы былі ўпэўненыя, што едуць на профільную нараду да Лукашэнкі.
«А фішка ж таемнай інаўгурацыі ў тым, што першае правіла байцоўскага клуба — ніхто не павінен ведаць аб байцоўскім клубе. То-бок, яны сапраўды нікому не сказалі. Я думала, што яны не сказалі сёстрам Груздзевым, каб яны не разбалбаталі на ўвесь свет. (…) А яны проста не сказалі», — дзеліцца сваімі думкамі Лойка і дадае:
«Гэта вельмі добра характарызуе разуменне адміністрацыі «самі ведаеце каго» сваёй папулярнасці нават сярод людзей, якіх вы лічыце бліжнім колам, ці важнымі людзьмі краіны, ці топавымі бізнэсменамі краіны».
Лойка лічыць, што арганізатары інаўгурацыі пабаяліся, што людзі паспрабуюць знайсці прычыну не прыйсці:
«Захварэў, у адпачынку, у камандзіроўцы, у запоі, у мяне флюс, у мяне дзяцей з садка забраць няма каму. (…) Бо насамрэч момант быў такі, мне здаецца, што мала каму хацелася там свяціцца, акрамя чыноўнікаў».
Пры такой арганізацыі, як тлумачыць Лойка, «людзі аказаліся ў сітуацыі, калі рашуча незразумела было, што рабіць. (…) Яны разумелі, куды іх вязуць, але яны не думалі, што на інаўгурацыю. Яны думалі, што іх вязуць на нараду».
Па словах Лойкі, яе суразмоўцам, якія такім чынам трапілі на інаўгурацыю, было непрыемна.
«Калі табой маніпулююць, выкарыстоўваюць уцёмную, гэта непрыемна ў любым выпадку. Гэта шмат гаворыць пра тое, наколькі Лукашэнка ацэньваў сваю папулярнасць у той момант. Таму што, калі б яшчэ і пустая зала была, то проста наогул непрыгожа атрымалася б. А так поўная зала была забяспечана», — канстатуе аглядальніца.
Цяпер чытаюць
Адпачынак у Эміратах скончыўся для сям'і трагедыяй: «Мама памерла, а айчым апынуўся ў турме»2
Адпачынак у Эміратах скончыўся для сям'і трагедыяй: «Мама памерла, а айчым апынуўся ў турме»
Расійскія і лукашэнкаўскія спецслужбы на фоне залёту дронаў у Польшчу правялі інфаатаку. Яе зладжанасць дае падставы думаць, што залёт быў спланаваны1515
Каментары
Можа, Нехта бы зліў інфармацыю ў незалежныя СМІ ці расказаў пратэстнай суполцы.
А дзе ж тады мяжа, за якой заканчваецца супрацоўніцтва?
Гучыць так, што ў той момант тыя людзі разглядалі 2 варыянты падзей і перад "народам" мелі апраўданне "нам было непрыемна, нас падманулі".
Мяркую, што людзі таго ўзроўню "не першы раз замужам" і перажылі шмат падманаў і маніпуляцый, у многіх удзельнічалі самі.
А служба бяспекі дзейнічала так верагодна не таму, што "лідар непапулярны, людзі не прыйдуць", а з-за бяспекі. Каб у тыя непрадказальныя дні цалкам мінімізаваць рызыкі.