Расія пашырыла сваё прадпрыемства па вытворчасці стратэгічных бамбавікоў
Расія значна пашырыла Казанскі авіяцыйны завод імя Гарбунова, дзе вырабляюцца і мадэрнізуюцца стратэгічныя бамбавікі, у тым ліку носьбіты ядзернай зброі, як, напрыклад, Ту-160. Паводле фінскага выдання Yle, гэта пацвярджаюць спадарожнікавыя здымкі.
Узімку на тэрыторыі завода з’явіліся новыя вялікія вытворчыя карпусы, адзін з якіх дасягае 320 метраў у даўжыню і займае амаль 19 000 м² — гэта прыкладна тры футбольныя палі.
Мадэрнізацыя адбываецца ў межах праграмы коштам каля 1 мільярда еўра, накіраванай на развіццё вайсковай і цывільнай авіяцыі. Але праект сутыкаецца з цяжкасцямі — з-за санкцый і дэфіцыту кваліфікаваных кадраў не атрымліваецца выконваць графікі паставак.
Казанскі завод — ключавое прадпрыемства для расійскай абарончай прамысловасці, бо толькі ён здольны аднавіць або вырабіць новыя стратэгічныя самалёты пасля панесеных страт. Напрыклад, у чэрвені каля 30% расійскай стратэгічнай авіяцыі было пашкоджана або знішчана ўкраінскімі ўдарамі падчас аперацыі «Павуцінне».
Аналізуючы сітуацыю, вайсковы эксперт Марка Эклунд з Фінляндыі адзначае: нягледзячы на будаўніцтва новых вытворчых плошчаў, гэта не вырашае сістэмных праблем галіны. Расія працягвае выпускаць маральна састарэлыя мадэлі, што сведчыць пра яе тэхналагічнае адставанне ад ЗША.
У 2024 годзе завод змог паставіць толькі два Ту-160М2 і два Ту-160М, а таксама мадэрнізуе Ту-22М3, якія выкарыстоўваюцца для запуску крылатых ракет па Украіне.
Акрамя вайсковых задач, завод займаецца і цывільнай авіяцыяй — у прыватнасці, Ту-204 і Ту-214. Але і тут вынікі сціплыя: пры наяўнасці кантракту на 23 Ту-214 у 2025 годзе пабудаваны толькі адзін.
Нягледзячы на санкцыі, Расія за апошнія гады змагла набыць авіяцыйныя камплектуючыя на суму каля мільярда еўра, карыстаючыся абыходнымі схемамі. Але цяпер, паводле Yle, гэтыя шляхі становяцца ўсё менш эфектыўнымі.
Украінцы знішчылі два расійскія самалёты на аэрадроме пад Валгаградам, яшчэ два пашкоджаныя
«Тое, што Ізраіль зрабіў з Іранам, — гэта тое, што Расія хацела зрабіць з Украінай»
Украінскі F-16 збіў расійскі Су-35 дзякуючы дапамозе шведскага самалёта
З'явілася новае ВІДЭА спецаперацыі СБУ «Павуцінне»: з камеры, замацаванай на самім дроне
Расія не зможа аднавіць страты дальняй авіяцыі пасля ўкраінскай аперацыі «Павуцінне»
Цяпер чытаюць
Андрэй Швед, архітэктар рэпрэсій, прызначаны старшынёй Вярхоўнага суда4
Каментары