З афіцыйнай біяграфіі Турчына на сайце Саўміна выдалілі інфармацыю пра невядомыя 5 гадоў яго жыцця ў 90-я
Менш за суткі правісела афіцыйная біяграфія нядаўна прызначанага прэм'ер-міністра Беларусі Аляксандра Турчына на сайце ўрада. Пасля публікацыі яе на сайце Reform.news біяграфію спачатку выдалілі, а затым вярнулі ўсечаны варыянт. Што ж там было такога?
Пасля назначэння Аляксандра Турчына прэм'ерам Беларусі СМІ апублікавалі яго біяграфію.
Жыццёвы шлях новага кіраўніка ўрада выглядае вертыкальным узлётам з самых нізоў. Аднак уважлівы назіральнік мог заўважыць дзіўны прабел паміж датай заканчэння школы ў 1992 годзе і пачаткам працоўнай дзейнасці ў 1997 годзе.
Аляксандр Турчын нарадзіўся ў Навагрудку 2 ліпеня 1975 года.
Яго маці працавала медыкам, а бацька быў важным чыноўнікам — былы школьны настаўнік Генрых Станіслававіч стаў загадчыкам арганізацыйнага аддзела ў гаркаме партыі, а затым кіраўніком спраў у райвыканкаме.
«Салідарнасць», якая ў свой час займалася біяграфіяй Турчына, піша, што будучы прэм'ер-міністр скончыў сярэднюю школу №4 са срэбным медалём і Навагрудскі дзяржаўны гандлёва-эканамічны тэхнікум. Затым бацька па знаёмстве прыстроіў яго дырэктарам прадуктовай крамы калгасу «Авангард». Аляксандру было тады 22 гады, то-бок гаворка ідзе аб 1997 годзе.
«Прапрацаваў Аляксандр Турчын у краме нядоўга — год-паўтара. Неўзабаве ён уладкаваўся галоўным кантралёрам-рэвізорам упраўлення Міністэрства фінансаў па Навагрудскім раёне, а затым па Гродзенскай вобласці» , — піша «Салідарнасць».
Далей кар'ера будучага прэм'ера праходзіла ўжо навідавоку, і ніякіх сакрэтаў у гэтым перыядзе няма. Але давайце ўсё ж вернемся ў 90-я.
Пасля прызначэння на пасаду кіраўніка ўрада на сайце Саўміна Беларусі з'явілася, нарэшце, адносна поўная афіцыйная біяграфія, заўважылі журналісты Reform.news.
Аказваецца, у 1992 годзе Саша Турчын паступіў у Магілёўскі машынабудаўнічы інстытут, але праз тры гады яго кінуў. Ніякай інфармацыі аб тым, што ён сканчаў тэхнікум, няма.
Потым два гады ён не рабіў нічога — быў беспрацоўным на ўліку ў Навагрудскім цэнтры занятасці Гродзенскай вобласці. Па невядомай прычыне Турчын таксама не пайшоў у войска.
Яго першым месцам працы была зусім не крама ў калгасе «Авангард», а Навагрудскі райвыканкам, дзе працаваў яго бацька. Там Саша 7 месяцаў лічыўся вартаўніком.
І толькі потым уладкаваўся дырэктарам у краму.
У 2002 годзе ён скончыў Беларускі дзяржаўны эканамічны ўніверсітэт, у 2009 годзе — Акадэмію кіравання пры прэзідэнце Рэспублікі Беларусь.
Толькі зрабіў ён гэта завочна, таму што працягваў працу кантралёрам-рэвізорам у рэгіянальным упраўленні Мінфіна.
Дзіўна, што гэтыя старонкі біяграфіі Аляксандра Генрыхавіча ўсплылі толькі зараз. Ствараецца ўражанне, што ён іх саромеецца.
Больш за тое, падрабязная біяграфія правісела літаральна некалькі гадзін, і пасля публікацыі на REFORM.news была выдалена.
Сёння прэс-служба ўрада прапанавала новы варыянт —інфармацыя аб вучобе ў магілёўскай ВНУ, беспрацоўным перыядзе і працы вартаўніком адсутнічае.
Цяпер жыццёвы шлях Аляксандра Турчына пачынаецца ў 1997 годзе ў якасці дырэктара магазіна калгаса «Авангард». Што рабіў новы прэм'ер да 22 гадоў — зноў таямніца.
Сустрэчу Рыжанкова з Сікорскім папрасіў Мінск. Што каманда Ціханоўскай абмяркоўвала з палякамі да і пасля яе11
Каментары