«300 тысяч брытанскіх патрыётаў, вамі ганарыцца ўвесь гробаны заходні свет».
У брытанскім сегменце твітара (X) пачалі распаўсюджвацца відэа антыўрадавага шэсця мясцовых ультраправых, якія незадаволеныя наяўнасцю мігрантаў (пераважна з ісламскіх краін) у Вялікабрытаніі. Самі мітынгі адбыліся 26 кастрычніка.
На адным з відэа, якое распаўсюджвалі брытанскія ўльтраправыя, аказаўся «Марш новай Беларусі», які ладзіўся сотнямі тысяч беларускіх пратэстоўцаў 23 жніўня 2020 года супраць гвалту сілавікоў і фальсіфікацыі Аляксандрам Лукашэнкам прэзідэнцкіх выбараў.
Акаўнт ультраправых, які выклаў гэтае відэа, падпісаў яго так (перакладаем без мацюкоў).
«Якое дзівоснае відовішча — 300 тысяч брытанскіх патрыётаў. Сёння ганаруся тым, што я брытанец, як ніколі. Томі намі ганарыцца, мы сабой ганарымся. Увесь заходні свет намі ганарыцца. Выдатная праца», — піша адзін з акаўнтаў брытанскіх ультраправых.
Як паведамляе выданне Deutsche Welle, 26 кастрычніка некалькі тысяч прыхільнікаў брытанскага ўльтраправага актывіста Томі Робінсана сабраліся ў цэнтры Лондана на антыўрадавую дэманстрацыю пад назвай Unite the Kingdom («Аб'яднаць Каралеўства»).
Томі Робінсан — псеўданім зацятага антыімігранцкага актывіста, ісламафоба і былога лідара ўльтраправага руху «Абарончая ліга Англіі» Стывена Якслі-Ленана, які заклікаў сваіх прыхільнікаў выйсці на вуліцы супраць «тыраніі» брытанскага прэм'ер-міністра Кіра Стармера. Сам 41-гадовы радыкальны актывіст павінен быў стаць галоўным прамоўцам на гэтай акцыі, аднак прысутнічаць на ёй не змог, паколькі быў затрыманы паліцыяй.
Сярод сабраных на пратэст 26 кастрычніка ў Лондане пераважалі белыя мужчыны сярэдняга ўзросту. Некалькі ўдзельнікаў акцыі прынеслі плакаты ў падтрымку экс-прэзідэнта ЗША Дональда Трампа, таксама быў заўважаны расійскі сцяг».
Цяпер чытаюць
Як беларусы ў Вільні адзначылі Дзень Волі ШМАТ ФОТА4
Як беларусы ў Вільні адзначылі Дзень Волі ШМАТ ФОТА
Часам нечаканая гісторыя беларускіх гімнаў: «Мы выйдзем шчыльнымі радамі», «Пагоня», «Жыве Беларусь», «Радзіма мая дарагая», «Магутны Божа» (з ВІДЭА)1111
Каментары
Калі так дык мэйнстрымных еўрапейскіх палітыкаў тыпу Туска таксама хутка акрэсліце як "ультраправых" за завостранне міграцыйнай палітыкі? Бо ёсць разуменне небяскекі для Еўропы і таксама факту, што самі еўрапейцы таму апошні час галасаюць так, а не інашк з увагі на ПРАБЛЕМЫ з ісламістамі, якія не асімілююцца.
Дарэчы, пра апошнія рэкорды ў шведскіх статыстыках напішаце? Ці афіцыйныя шведскія крымінальныя статыстыкі таксама "ісламафобскія", зрэшты, як іспанскія і іншыя.