Польскі суддзя-перабежчык: «Ідыёты з Беларусі ніколі гэтага не зразумеюць. Цяпер я развітваюся»
Увечары пятніцы ў блогу польскага суддзі Томаша Шміта з'явіліся дзіўныя допісы на польскай і рускай мовах, звярнуў увагу Reform.news.
«Яны заб'юць мяне за гэта» — гаварылася ў адным з іх. Мяркуючы па адказах, блог у сетцы X вядзе сам Шміт.
Спачатку Шміт апублікаваў спасылку на песню нямецкага метал-гурта Erdling «Mein Element» і падпісаў: «Люблю іх».
Гэтага яму здалося недастаткова, і тады былы суддзя дадаў: «Гэтыя ідыёты з Беларусі ніколі гэтага не зразумеюць. Цяпер я развітваюся з Таўмі (магчыма, «вамі»)».
Затым допісы Шміта прынялі малазразумелы выгляд.
Ён напісаў: «Яны заб'юць мяне за гэта». Адзін з чытачоў удакладніў у яго, ці п'яны ён. «Не ў гэтай тэме», — адказаў былы суддзя.
Яшчэ адзін чытач спытаў у тым жа пасце, навошта той піша глупства.
«Гэта проста праўда. Мне напляваць на дамоўленасці», — парыраваў Шміт.
Чытач паспрабаваў супакоіць яго: «Мне таксама, але мы не можам без іх жыць. Разумею моманты сумневаў, але заўтра будзе лепш». На што Шміт груба адказаў фразай, якую можна перавесці так: «Выкінулі рускага». На ўдакладненні Шміт больш не адказваў.
Адзначыўся ён і ў іншых каментарах пад сваімі пастамі (аўтаматычны пераклад з польскай):
«Пляваць на гэта. Я яшчэ магу ім разбурыць гэтую дзяржаву».
«Мае за мной. Цяпер ім проста хана)».
«Працую браты» (па-руску).
У каментах карыстальнікі сеткі X бурна адрэагавалі на допісы збеглага польскага суддзі. Вось толькі частка адказаў, якія ён атрымаў:
«У Польшчы нікога не пераследуюць за тое, што ён слухае нямецкія гурты». «Мядовы месяц скончыўся?». «Да пабачэння, таварыш»
«Калі ласка, перадайце ад мяне прывітанне Эмілю Чэчку, калі сустрэнецеся ў Валгале».
***
Томаш Шміт аб'явіўся ў Беларусі ў пачатку мая 2024 года. Ён даў прэс-канферэнцыю, на якой заявіў, што будзе прасіць у краіне палітычнага прытулку. У Польшчы Шміт быў замяшаны ў так званай хейтарскай афёры. Пасля ўцёкаў яго сталі падазраваць у шпіянажы. Шміт абвешчаны ў вышук, у дачыненні да яго распачатая крымінальная справа. У Беларусі ад яго імя публікуюцца прапагандысцкія матэрыялы пра сітуацыю ў Польшчы.
Раней з Польшчы ў Беларусь уцёк яшчэ адзін паляк — Эміль Чэчка. У снежні 2021 года ён дэзерціраваў з польскага войска і даваў шырокія інтэрв'ю беларускім дзяржаўным тэлеканалам пра нібыта генацыд мігрантаў на польскай мяжы. 17 сакавіка 2022 года ён быў знойдзены павешаным па месцы пражывання ў Мінску.
Каментары