Раней Уладзімір Зяленскі публічна звяртаўся да кітайскага лідара Сі Цзіньпіна з заклікам узяць удзел у саміце, як у Кіеве называюць канферэнцыю, што пройдзе ў сярэдзіне чэрвеня ў Швейцарыі, піша Радыё Свабода.
Кітай не накіруе сваіх прадстаўнікоў на канферэнцыю па спыненні вайны ва Украіне, якая пройдзе ў Швейцарыі ў чэрвені. Пра гэта піша Reuters са спасылкай на чатыры крыніцы. Раней Уладзімір Зяленскі публічна звяртаўся да кітайскага лідара Сі Цзіньпіна з заклікам узяць удзел у саміце, як у Кіеве называюць канферэнцыю.
Па словах суразмоўцаў агенцтва, Пекін прыняў такое рашэнне, бо не былі выкананыя ўмовы, якія былі неабходныя для яго ўдзелу. Сярод іх — запрашэнне на саміт і Расіі, і Украіны для «роўнага ўдзелу ўсіх бакоў і сумленнага абмеркавання ўсіх прапаноў». Раней такія ўмовы таксама агучваў МЗС Кітая.
Масква не запрошаная на канферэнцыю, хоць Швейцарыя «перакананая, што Расія павінна быць уцягнутая ў працэс» па ўрэгуляванні канфлікту. Украіна не хоча, каб Масква сарвала працэс, тлумачыў прэзідэнт краіны Уладзімір Зяленскі. Расійскіх прадстаўнікоў плануюць прыцягнуць праз пасрэднікаў ужо на наступным этапе. Расія, у сваю чаргу, заяўляла, што не прыняла б удзелу ў сустрэчы, нават калі б яе запрасілі, бо не мае намеру абмяркоўваць вывад войскаў з Украіны.
Усяго, па словах прадстаўніка швейцарскага МЗС, на саміт запрасілі больш за 160 дэлегацый. «Больш за 70 дзяржаў пацвердзілі свой удзел у мірнай канферэнцыі, большасць з іх — на ўзроўні кіраўнікоў дзяржаў і ўрадаў», — паведамілі ў ведамстве.
Агенцтва Bloomberg раней пісала, што прэзідэнт ЗША Джо Байдэн, хутчэй за ўсё, прапусціць сустрэчу па Украіне з-за мерапрыемства па зборы сродкаў на сваю выбарчую кампанію.
Прэзідэнт Украіны Уладзімір Зяленскі заклікаў прыехаць на «саміт міру» і Байдэна, і Сі Цзіньпіна.
«Калі ласка, праявіце ваша лідэрства ў набліжэнні міру — сапраўды міру, а не паўзы паміж ўдарамі», — кажа ён.
Газета Financial Times даведалася, што офіс Зяленскага склаў для ўкраінскіх чыноўнікаў памятку з тэзісамі для «ўзмацнення грамадскага ціску» на Байдэна і Сі Цзіньпіна.
Канферэнцыя, на якой будуць абмяркоўваць шляхі спынення вайны ва Украіне, пройдзе ў Бюргенштоку (Швейцарыя) з 15 па 16 чэрвеня.
Цяпер чытаюць
Яўген Афнагель расказаў, што было пасля суда, дзе скандавалі «Верым, можам, пераможам!» І назваў, хто для яго сапраўдны лідар Беларусі5
Каментары