Мінадукацыі катэгарычна забараніла выпускныя ў кавярнях і рэстаранах
Праводзіць святочныя вечары дазволілі толькі ў школах і дамах культуры.
Міністэрства адукацыі Беларусі выпусціла загад, які забараняе правядзенне выпускных вечароў у кавярнях і рэстаранах. Пра гэта расказала прадстаўніца ведамства, кансультантка Галоўнага ўпраўлення выхаваўчай работы і маладзёжнай палітыкі Мінадукацыі Таццяна Асмалоўская.
Паводле слоў чыноўніцы, ведамства рэгламентавала арганізацыю выпускных вечароў. Праводзіць выпускныя можна ў памяшканнях устаноў адукацыі. У выключных выпадках — у дамах культуры ці палацах дзяцей і моладзі, піша БелТА.
«Рэгулярна паступаюць пытанні і ад бацькоў, і ад выпускнікоў аб тым, ці можна праводзіць выпускныя вечары ў рэстаранах, кавярнях, забаўляльных цэнтрах і іншых аб'ектах. Адназначна — не. Гэтая пазіцыя вызначаная ў загадзе Міністэрства адукацыі», — адзначыла Асмалоўская.
Чыноўніца адзначыла, што лакацыя правядзення выпускнога павінна быць на кантролі міліцыі і аддзелаў адукацыі.
Сёлета выпускнікамі 11-х класаў стануць больш за 55 тыс. чалавек, 9-я класы сканчаюць больш за 108 тыс. Апошнія званкі ў школах Беларусі прагучаць 25 мая, выпускныя пройдуць 14 чэрвеня.
Аляксандр Лукашэнка раней абурыўся раскошай беларускіх выпускных. Пасля яго выказвання ў Мінску забаранілі выкарыстоўваць на выпускных вечарах лімузіны і запрашаць дыджэяў.
Каментары