Справу Франака Вячоркі накіравалі ў Вярхоўны суд. Налічылі шкоды на 30 мільёнаў рублёў
Яго нават завочна змясцілі пад варту.
Генпракуратура накіравала ў Вярхоўны суд для вызначэння падсуднасці крымінальную справу ў дачыненні да Франака Вячоркі, якому ставяць у віну «здзяйсненне шэрагу злачынстваў экстрэмісцкай накіраванасці», у тым ліку супраць дзяржавы, паведамляе БелТА.
Згодна з матэрыяламі справы, Вячорку інкрымінавана тое, што ён у перыяд, які папярэднічае прэзідэнцкім выбарам 2020 года, падчас, а таксама пасля іх правядзення «здзейсніў змову з мэтай захопу дзяржаўнай улады неканстытуцыйным шляхам, публічна заклікаў да захопу дзяржаўнай улады, акту тэрарызму і іншых дзеянняў, накіраваных на прычыненне шкоды нацыянальнай бяспецы Беларусі, у тым ліку прымяненне мер абмежавальнага характару (санкцый) у дачыненні да краіны, яе фізічных і юрыдычных асоб».
Яму ж інкрымінавана распаўсюджванне з выкарыстаннем СМІ і інтэрнэту матэрыялаў з такімі заклікамі, у тым ліку звернутымі да замежнай дзяржавы, замежнай або міжнароднай арганізацыі, аб здзяйсненні такіх дзеянняў.
Акрамя таго, Франак Вячорка абвінавачваецца ў арганізацыі масавых беспарадкаў, якія «суправаджаліся гвалтам над асобай, пагромамі, падпаламі і знішчэннем маёмасці, стварэнні экстрэмісцкага фарміравання і кіраўніцтве ім, распаўсюдзе ў Інтэрнэце для прычынення істотнай шкоды дзяржаўным і грамадскім інтарэсам загадзя ілжывыя і дыскрэдытуючыя Беларусь звесткі аб яе палітычным, эканамічным, сацыяльным, ваенным і міжнародным становішчы, прававым становішчы яе грамадзян, а таксама дзейнасці дзяржаўных органаў, Узброеных Сіл, іншых войскаў, воінскіх фарміраванняў і ваенізаваных арганізацый і інш»
Сцвяржаецца, што выстаўленае Вячорку абвінавачванне абгрунтавана наяўнымі ў крымінальнай справе доказамі. «Мера стрымання ў выглядзе заключэння пад варту прыменена да яго правільна, падстаў для яе змены альбо адмены не маецца».
Накіроўваючы крымінальную справу ў суд, намеснік генпракурора прад'явіў да абвінавачанага пазоў у інтарэсах дзяржавы ў асобе Міністэрства фінансаў аб кампенсацыі маёмаснай шкоды ў суме больш за Br30,9 млн, нанесенай «супрацьпраўнымі дзеяннямі Вячоркі».
Каментары
а хто памятае (час), калі франак злучыўся са светай?