Шпакоўскі пагражае расійскаму «Коммерсанту» блакіроўкай на тэрыторыі Беларусі
Дарадца беларускай амбасады ў РФ Аляксандр Шпакоўскі прыгразіў блакаваннем «Коммерсанту» за артыкул нібыта аб намеры Беларусі адмовіцца ад абслугоўвання плацежных картак сістэмы «Мир».
«3 красавіка выданнем «Коммерсант» была апублікаваная паклёпніцкая інфармацыя пра нібыта намер Рэспублікі Беларусь адмовіцца ад абслугоўвання плацежных картак сістэмы «Мир», піша Шпакоўскі ў тэлеграме.
Паводле яго, гэту інфармацыю з «Коммерсанта» перапосцілі іншыя рэсурсы.
«Неабходна падкрэсліць, што публікацыя «Коммерсанта» мае ўсе прыкметы класічнай інфармацыйнай дыверсіі, накіраванай на падрыў даверу ўнутры Саюзнай дзяржавы Беларусі і Расіі», — піша Шпакоўскі.
Паводле яго, «паклёп («укід») публікуецца напярэдадні перамоваў кіраўніцтва Цэнтрабанка РФ і Нацбанка Рэспублікі Беларусь».
«Такім чынам, шляхам свядомай дэзынфармацыі шырокай грамадскасці нанесена адчувальная шкода іміджу Рэспублікі Беларусь і беларуска-расійскім адносінам. Пытанне «Каму выгадна?» застаецца адкрытым», — піша ён.
І пагражае, што «ў працэсе прыняцця мер рэагавання Міністэрствам інфармацыі Рэспублікі Беларусь могуць быць прыняты рашэнні па блакаванні рэсурсу «Коммерсант» у беларускім лічбавым сегменце».
Між тым, у артыкуле «Коммерсант» напісаў пра захаванне супрацоўніцтва «Мира» з сістэмай «Белкарт». Паводле выдання, існуюць рызыкі праз другасныя санкцыі, але рызыкі спынення супрацоўніцтва менавіта з «Белкарт» — мінімальныя.
Цяпер чытаюць
Арыштаваны сенатар Карпіцкі, галоўны доктар Брэсцкай абласной бальніцы11
Каментары