Пражскі стралок пакінуў перадсмяротную запіску, у якой прызнаўся ў забойстве яшчэ двух чалавек
Давід Козак, які тыдзень таму застрэліў у Карлавым універсітэце ў Празе 14 чалавек, у перадсмяротнай запісцы прызнаўся, што перад гэтым забіў мужчыну і ягоную двухмесячную дачку. Пра гэта ў сераду абʼявіла паліцыя Чэхіі, піша BBC.
24-гадовы Давід Козак ужо быў галоўным падазраваным у падвойным забойстве 15 снежня: пасля бойні ва ўніверсітэце 21 снежня чэшская прэса паведамляла, што паліцыя правяла балістычную экспертызу і ўстанавіла, што ў абодвух выпадках стралялі з адной і той жа зброі.
Козак забіў яшчэ і ўласнага бацьку, гэта значыць, у суме ён застрэліў 17 чалавек.
Сам стрэлак наклаў на сябе рукі, калі яго заблакавалі ва ўніверсітэце паліцыянты.
15 снежня Козак застрэліў у лесе Клановіцы на ўскраіне Прагі 32-гадовага мужчыну і яго двухмесячную дачку.
Пасля расстрэлу ва ўніверсітэце паліцыянты сказалі, што ў следстве па справе аб забойстве 15 снежня ў іх было каля чатырох тысяч патэнцыйных падазраваных, і Козак быў у спісе, але, на жаль, дабрацца да яго і дапытаць яны не паспелі.
Адносна матываў Козака паліцыя пакуль нічога афіцыйна не гаворыць.
У мінулую суботу ў Чэхіі быў абʼяўлены дзень жалобы па ахвярах расстрэлу ў Карлавым універсітэце. Акрамя таго, міністр унутраных спраў Віт Ракушан заклікаў мэраў усіх гарадоў і вёсак адмяніць навагоднія феерверкі, а суграмадзян — адзначыць Новы год без шумных свят з павагі да памяці загінулых і пачуццяў іх родных.
Масавыя забойствы, учыненыя ў Еўропе ў XXI стагоддзі стралкамі-адзіночкамі:
Нарвегія, ліпень 2011 года. Андэрс Брэйвік забіў 77 чалавек: 69 ён застрэліў у летнім моладзевым лагеры на востраве Утэя, восем загінулі ад выбуху закладзенай ім у аўтамабіль бомбы ў Осла.
Германія, красавік 2002 года. 19-гадовы Роберт Штайнхойзер забіў 16 чалавек — 13 настаўнікаў, двух вучняў і паліцэйскага — у гімназіі ў Эрфурце, адкуль яго выключылі за некалькі месяцаў да гэтага.
Германія, сакавік 2009 года. 17-гадовы Цім Крэчнер застрэліў 15 чалавек: дзевяць вучняў і траіх настаўнікаў у сваёй былой школе ў горадзе Вінендэн і трох мінакоў у суседнім горадзе Вендлінгег.
Швейцарыя, верасень 2001 года. Фрыдрых Лайбахер, увайшоўшы ў форме паліцыянта ў будынак рэгіянальнага парламента ў горадзе Цуг, застрэліў 14 чалавек і параніў яшчэ 10.
Сербія, красавік 2013 года. Любіш Багдановіч застрэліў 13 чалавек, уключаючы двухгадовага хлопчыка, і параніў сваю жонку ў вёсцы пад Бялградам.
Цяпер чытаюць
Праца фізічнага офіса Ціханоўскай у Вільні часова прыпынена36
Каментары