Парэшткі мінскага бізнэсмена знайшлі праз 25 гадоў пасля яго знікнення
31 снежня 1997 года ў Мінску знік 40-гадовы бізнэсмен. Ён выйшаў з дому на сустрэчу са сваім кампаньёнам і бясследна знік. Толькі праз 25 гадоў следчыя паведамілі, што знайшлі парэшткі мужчыны і меркавана вінаватых у яго забойстве, паведамляе Следчы камітэт.
Паводле матэрыялаў справы, летам 1996 года мужчыны сталі займацца бізнэсам. Для яго развіцця бралі грошы ў доўг пад працэнты. Увосень 1997 года наступаў тэрмін вяртання пазыкі — 60 тысяч даляраў ЗША аднаму са знаёмых. Але вярнуць яе партнёры з нейкіх прычын не маглі.
Некалькі дзён вестак ад зніклага бізнэсмена не было. Але 3 студзеня 1998 года мужчына стаў тэлефанаваць сваім сваякам і знаёмым з просьбай пазычыць 53 тысячы даляраў ЗША. На пытанні адносна свайго месца знаходжання ён не адказваў і абяцаў расказаць усё пазней.
Пасля 10 студзеня бізнэсмен увогуле перастаў выходзіць на сувязь. Тады ягоная жонка звярнулася ў міліцыю, якая пачала шукаць зніклага.
У першую чаргу апыталі ягонага бізнэс-партнёра, на сустрэчу да якога накіроўваўся мужчына. Са слоў таго, сустрэча не адбылася. Ніякіх зачэпак знайсці не ўдалося.
Нечаканы паварот адбыўся ў лютым 1998 года. Двое знаёмых, якім зніклы вінен быў буйную суму, атрымалі пасылкі з выбуховымі прыладамі. Дзякуючы міліцыі бандэролі былі своечасова канфіскаваныя і размініраваныя. З унутранай упакоўкі адной з іх узялі след пальца рукі. Аднак высветліць, каму менавіта ён належаў, у той час не ўдалося. Падазраваць сталі зніклага бізнэсмена. У яго з атрымальнікамі выбухованебяспечных пасылак былі напружаныя адносіны з-за вялікага доўгу.
Міліцыянты шукалі мінчука як у Беларусі, так і па-за яе межамі. Аднак вызначыць ягонае месца знаходжання так і не змаглі, а па факце знікнення без вестак завялі крымінальную справу.
І вось толькі ў 2023 годзе следчымі ад экспертаў была атрымана інфармацыя аб супадзенні знойдзенага ў 1998 годзе следу рукі з адбіткам пальца жыхара Гомельскай вобласці 1973 года нараджэння. Вядома, што ён разам з падзельнікам у 1990-х знаходзіўся ў злачыннай групоўцы. Дзейнічалі яны і ў Мінску. У 2001 годзе мужчыны былі асуджаныя за захоп закладніка.
Цяпер у ходзе аператыўна-вышуковых мерапрыемстваў і следчых дзеянняў даказалі дачыненне затрыманых, а таксама яшчэ 4 асоб, у тым ліку бізнэс-партнёра, да знікнення сталічнага прадпрымальніка 25 гадоў таму.
Сцэнарый сустрэчы з кампаньёнам быў распрацаваны загадзя. Напарніка не задавальнялі бясконцыя даўгі. Ён вырашыў уладкаваць фінансавыя пытанні радыкальным спосабам. У прызначаны час мужчыны сустрэліся і адправіліся на здымную кватэру па вуліцы Рафіева. Тут іх ужо чакалі «калектары». Даўжніка звязалі, утрымлівалі і перыядычна прымушалі прасіць у сваякоў і знаёмых пазычыць грошай.
Высветлілася, што пасылкі з выбухоўкай былым калегам бізнэсмена адпраўлялі самі фігуранты. Рабілі яны гэта, каб адцягнуць увагу міліцыі ад знікнення мужчыны. Гэтым стваралася бачнасць, што ён наўмысна схаваўся з буйной сумай.
Цяпер у лесе ў Мінскай вобласці выявілі месца, дзе выкрадальнікі закапалі цела зніклага прадпрымальніка. У ходзе далейшай працы там знайшлі чалавечы шкілет. Канчатковае пацвярджэнне прыналежнасці выяўленых парэшткаў мужчыну дадуць судовыя эксперты-генетыкі цэнтральнага апарата Дзяржаўнага камітэта судовых экспертыз.
Па крымінальнай справе затрымалі шэсць чалавек. Яны датычныя да невядомага знікнення камерсанта, замаху на забойства двух яго знаёмых, крадзяжу, рабавання і хуліганства. Фігуранты — мужчыны ва ўзросце ад 46 да 66 гадоў.
Да пяці з абвінавачаных абралі меру стрымання ў выглядзе змяшчэння пад варту. Канчатковая прававая ацэнка іх дзеянням будзе дадзена пасля заканчэння расследавання.
Цяпер чытаюць
«Мы кідалі камяні, каб яны не ўзляталі». Адным з тых, хто спрабаваў спыніць дроны, што выляталі з фур, быў беларус Антон42
Каментары