У Грузію прыехалі дактары з Польшчы для медыцынскага абследавання Міхаіла Саакашвілі
Група польскіх дактароў пачала ўсебаковае медыцынскае абследаванне былога прэзідэнта Грузіі Міхаіла Саакашвілі, як паведаміў прэм'ер-міністр Польшчы Матэвуш Маравецкі, піша Meduza.io.
Прадстаўнік партыі «Адзіны нацыянальны рух» Георгій Чаладзэ ўдакладніў, што ў Грузію прыбылі пяць дактароў. Паводле яго слоў, тэрміны іх місіі не абмежаваныя: яны прабудуць у краіне столькі, колькі спатрэбіцца. Медыцынскае заключэнне будзе канфідэнцыйным, яго перададуць краінам ЕС.
Перамовы аб медыцынскім абследаванні Саакашвілі вяліся некалькі месяцаў: улады Польшчы яшчэ ў сакавіку 2023 года казалі, што гатовыя адправіць дактароў, аднак Грузія доўга не давала на гэта згоды.
«Пасля шасці месяцаў затрымак урад нарэшце дазволіў дактарам наведаць Міхаіла Саакашвілі ў бальніцы. Дактары вывучаць яго стан і пасля зробяць свае высновы», — сказаў агенцтву AFP адвакат былога прэзідэнта Дзіта Садзаглішвілі.
Міхаіл Саакашвілі знаходзіцца пад вартай з кастрычніка 2021 года. Саакашвілі, якому грузінскія суды завочна вынеслі прысуды па некалькіх справах, арыштавалі пасля таго, як ён вярнуўся ў краіну, нелегальна перайшоўшы мяжу.
Пад арыштам, як неаднаразова заяўлялі адвакаты палітыка, стан здароўя Саакашвілі рэзка пагоршыўся. З мая 2022 года палітык знаходзіцца ў тбіліскай клініцы «Вівамед». Падчас судовых пасяджэнняў 20 дактароў заявілі, што Саакашвілі знаходзіцца ў вельмі цяжкім стане. У лютым 2023 года паведамлялася, што Саакашвілі важыў 67 кілаграмаў. Перад арыштам ён важыў 116 кілаграмаў пры росце 195 сантыметраў.
У лютым 2023 года Тбіліскі гарадскі суд адхіліў хадайніцтва абароны Саакашвілі аб яго вызваленні з-за кратаў або адтэрміноўкі прысуду па стане здароўя. У сакавіку аналагічнае рашэнне прыняў Апеляцыйны суд. У маі Еўрапейскі суд па правах чалавека таксама адхіліў просьбу адвакатаў аб вызваленні Саакашвілі для лячэння за мяжой.
Цяпер чытаюць
Рэпрэсіі разганяюцца ці запавольваюцца? Давайце лічыць9
Рэпрэсіі разганяюцца ці запавольваюцца? Давайце лічыць
Зніклы Анатоль Котаў быў партнёрам самага высокапастаўленага беларускага разведчыка, які пераехаў у Польшчу. Тут можа быць ключ да разгадкі яго знікнення7777
Каментары