У Японіі ютубера арыштавалі за спойлер да відэагульні. Такое адбылося ўпершыню ў гісторыі
Пры гэтым сама гульня выйшла шмат гадоў таму.
Жыхара Японіі арыштавалі за лэтсплэі са спойлерамі канцоўкі да відэагульні, якая першапачаткова была выпушчана больш за 10 гадоў таму. Пра гэта 21 мая напісала выданне Japan Today.
52-гадовы Сінобу Ёсіда стаў першым чалавекам, каго японскія ўлады арыштавалі за незаконную публікацыю гульнявых відэаролікаў на YouTube. Мужчына загрузіў геймплэй візуальнай анімэ-навэлы «Steins;Gate: My Darling's Embrace» (якая выйшла яшчэ ў 2011 на кансолі Xbox, а затым у 2019 яе перавыпусцілі на іншыя платформы) і паказаў канец гэтай гульні. Самі відэаролікі пры гэтым былі манетызаваныя, што давала японцу грошы за прагляды.
Кампанія-распрацоўніца гульні адразу палічыла, што такім чынам парушаюцца яе аўтарскія правы, бо яна не давала дазволу на публікацыю яе кантэнту, а грошы ад даходу з відэа не пайшлі ёй у прыбытак.
У выніку японца абвінавацілі ў парушэнні аўтарскіх правоў і распаўсюджанні спойлераў. Той сваю віну прызнаў.
«Я ведаў, што гэта незаконна, нават калі я гэта рабіў», — сказаў Ёсіда падчас прызнання віны.
Гэты выпадак — першы ў гісторыі. Раней падобнае ніколі не было заўважана. Напэўна, гэты мужчына не стане апошнім.
Нагадаем, што для Японіі наяўнасць арыштаў за дзіўныя на першы погляд прычыны не ёсць чымсьці ўнікальным. Напрыклад, яшчэ ў мінулым месяцы двух мужчын там арыштавалі за «сушы-тэрарызм».
Чытайце таксама:
Mortal Kombat 1 перазапусціць легендарную серыю відэагульняў у верасні
LoL, DOTA 2, Counter Strike: што будзе з кіберспортам у 2023 годзе? Вось тэндэнцыі
Цяпер чытаюць
Лукашэнку на свяце ў Александрыі суправаджала афіцэр Зайцава17
Каментары