Прапагандысты ўдакладнілі, што арганізацыяй жаночых маршаў займалася Касцюгова-малодшая
У матэрыял праўладнай «Мінскай праўды», якая займаецца асвятленнем закрытага судовага працэсу па справе Neхta, унесена праўка, датычная асобы арганізатаркі ў 2020 годзе жаночых маршаў.
Раман Пратасевіч, даючы на судзе паказанні, адхрысціўся ад асабістага ўдзелу ў арганізацыі жаночых маршаў, сказаўшы, што гэтым займалася Касцюгова. Прапагандысты падалі справу так, што маецца на ўвазе палітзняволеная палітолаг Валерыя Касцюгова.
Супраць такой інтэрпрэтацыі рашуча запярэчыла дачка Валерыі Касцюговай Настасся, якая цяпер знаходзіцца за мяжой. Яна напісала:
«Дарагія пракуратура, суд, следчыя і хто там яшчэ. Для пратакола: у інтэрнэце ляжыць мноства розных інтэрв'ю, дзе я цалкам чыстасардэчна прызнаюся, што суарганізацыяй жаночых маршаў займалася я. Мама ніколі не мела да гэтага ніякага дачынення. Як і Пратасевіч».
Як ні дзіўна, гэта аказала на прапагандыстаў уздзеянне і ў іх матэрыяле на сайце «Мінскай праўды» зроблена ўдакладненне.
Каментары