Генеральны штаб Узброеных сілаў Украіны выступіў з заявай наконт статуса замежных грамадзян і асоб без грамадзянства, якія ўдзельнічаюць у баявых дзеяннях на тэрыторыі Украіны у складзе ўкраінскага войска. Падкрэсліваецца, што ўсе яны добраахвотна падпісалі кантракты і былі прынятыя на вайсковую службу, згодна з дзейным заканадаўствам.
Таму гэтыя людзі «з'яўляюцца вайскоўцамі Узброеных сілаў Украіны, на якіх… пашыраецца прававы статус камбатантаў», — гаворыцца ў заяве са спасылкай на Жэнеўскую канвенцыю.
«Гэты статус, між іншым, надае такім асобам права на абыходжанне з імі як з ваеннапалоннымі ў выпадку патрапляння ў рукі ворага», — піша ўкраінскі Генштаб. А таму «невыкананне адпаведных нормаў міжнароднага гуманітарнага права з'яўляецца сур'ёзным парушэннем канвенцыі».
Жэнеўскія канвенцыі 1949 года забараняюць любыя незаконныя акты, у тым ліку гвалт, запалохванне або бяздзейнасць у дачыненні да ваеннапалонных і абавязваюць да гуманнага абыходжання з вайскоўцамі, якія знаходзяцца ў палоне.
Пасля пачатку агрэсіі Расіі ваяваць за Украіну прыехалі тысячы добраахвотнікаў з іншых краіны, якія склалі Інтэрнацыянальны легіён. Некаторыя з іх патрапілі ў расійскі палон, дзе іх называюць «наймітамі» і судзяць. Гэтая заява выдадзеная з мэтай абароны гэтых людзей.
Актуальная яна сярод іншага і для беларускіх добраахвотнікаў, якія сёння абараняюць са зброяй у руках Украіну.
Каментары