У штабе Віктара Бабарыкі прайшла прэс-канферэнцыя кандыдата ў прэзідэнты Святланы Ціханоўскай, жонкі Валерыя Цапкалы Веранікі, а таксама прадстаўніцы штаба Віктара Бабарыкі Марыі Калеснікавай. Напярэдадні было дамоўлена пра аб’яднанне штабаў кандыдатаў. Усе жанчыны прыйшлі з кветкамі. Святлана Ціханоўская заняла месца па цэнтры.
Пачала выступаць Марыя Калеснікава, яна агучыла, што менавіта з ініцыятывы каманды Бабарыкі адбылося аб’яднанне. «Мы засталіся ўтраіх і дамовіліся за 15 хвілін», — сказала яна.
«Галоўны вораг сёння — не рэжым, а нявер'е ў тое, што нешта можа атрымаццца», — зазначыла Калеснікава.
«Вы ўсе ведаеце, чаму я на гэтым месцы — праз каханне, каханне да мужа. Я люблю Беларусь і беларусаў, таму я іду далей, нягледзячы на спробы мяне зламаць. Я іду дзеля сваіх дзяцей, каб яны не сядзелі ў турме без віны. Мы не робім нічога кепскага і незаконнага. Мы не верым у чэсныя выбары. Я ўдзячна падтрымцы беларусаў, толькі разам мы зможам пабудаваць краіну для жыцця», — сказала сама Святлана Ціханоўская.
«Мы аб’ядналіся на аснове пяці прынцыпаў: яўка на выбары 9 жніўня, вызваленне палітвязняў і эканамічных вязняў, правядзенне новых вольных выбараў», — адзначыла кандыдатка ў прэзідэнты.
За каго ж галасаваць заклікаюць штабы? «Вядома, за Святлану», — адзначыла Вераніка Цапкала.
«Несумленна ўлада зняла трох самых моцных кандыдатаў — Ціханоўскага, Цапкалу і Бабарыку. Улада баіцца жанчын. Мы не другасныя, мы стаім на роўных з мужчынамі і мы пераможам», — сказала Вераніка Цапкала.
Стала вядома, што Андрэй Дзмітрыеў падтрымаў ініцыятыву, але гаворка пра зняццё кандыдатаў не ідзе.
Марыя Калеснікава ўвесь час адзначала, што дзейнічаць трэба выключна ў рамках закона. Самай радыкальнай у сваіх прамовах была Вераніка Цапкала. Менавіта яна гаварыла пра «фальсіфікацыі» выбараў. «І суд, і ЦВК кантралююцца адным чалавекам», — сказала яна.
Пакуль ні Марыя Калеснікава, ні Вераніка Цапкала не ўвойдуць у спіс давераных асобаў Святланы Ціханоўскай.
«Мы гатовыя заклікаць людзей абараняць свае галасы так, як яны палічаць патрэбным», — увесь час падкрэслівала Святлана Ціханоўская. Колькі б журналісты ні спрабавалі давесці, ці ўключае гэта ў сябе вулічныя акцыі, удзельніцы прэс-канферэнцыі адмоўчваліся.
Святлана Ціханоўская сказала, што не ведае прычыны, чаму са спісу давераных асобаў яе сышлі прадстаўнікі «Еўрапейскай Беларусі». «Гэта лепш спытаць у іх», — сказала Ціханоўская.
«Мы бачым колькасць людзей і рэакцыю ўладаў, як АМАП хапае людзей, пенсіянераў, падлеткаў. АМАП даваў прысягу не аднаму чалавеку, а беларускаму народу, спыніце рэпрэсіі», — сказала Вераніка Цапкала.
Вось відэа прэс-канферэнцыі:
Памятаеце выпускніка інстытута ФСБ, які раскатваў па Гродне са сцягам Наваросіі? Цяпер ён стаў варшаўскім бізнэсменам29
Каментары