«Самым складаным быў аўторак, калі ліў моцны дождж»: ксёндз Уладзіслаў Завальнюк дабраўся на монаколе з Мінска ў Будслаў ФОТА
Пробашч Чырвонага касцёла, 70-гадовы ксёндз-канонік Уладзіслаў Завальнюк здзяйсняе 4-дзённую 132-кіламетровую адзіночную пілігрымку з Мінска ў Будслаў. Там сёння, 2 ліпеня, адзначаюць свята Будслаўскай іконы Божай Маці. Праз пандэмію пілігрымкі вялікімі групамі адмененыя. Таму ксёндз Уладзіслаў вырашыў адправіцца туды самастойна. У якасці транспартнага сродку абраў монакола, яздзе на якім навучыўся не так даўно, пішуць Мінск-навіны.
Перад ад'ездам 29 чэрвеня ў Чырвоным касцёле прайшла імша. Праводзіць ксяндза прыехалі каля 30 чалавек з монаколамі. За гарадской рысай святар перасоўваецца на монаколе ў адзіночку, але яго суправаджае легкавы аўтамабіль.
Загадчыца гаспадаркай Чырвонага касцёла Алена Кабяк распавяла «Мінск-навінам»:
— Зрабілі прыпынак у Даўгінаве, пробашч адпачывае, - распавяла яна. — Сёння (1 ліпеня) прайшлі 22 км. У першы дзень, як выправіліся з Мінска, праехалі ад МКАД адрэзак на 31 км. Надвор'е было нядрэннае, свяціла сонца. Цяжкім выдаўся аўторак, 30 чэрвеня, калі раніцай ліў моцны дождж.
Уяўляеце, у нашай машыне залівае лабавое шкло вадой, а ксёндз Уладзіслаў едзе на монаколе.
Яго жоўты плашч хоць лічыцца непрамакальным, але ўсё ж… а тут яшчэ разгуляўся моцны вецер, ды так, што стараўся сарваць нас з дарогі. Але потым надвор'е палепшылася.
Па словах А. Кабяк, пробашч рухаецца з хуткасцю прыкладна 25 км/г, праз 5-7 км робіць прыпынак, адпачывае 15-20 хвілін і едзе далей.
У шляху праводзіць імшу і абрад адарацыі.
Ехаць на монаколе на вялікую дыстанцыю няпроста: моцна стамляюцца спіна (трэба пастаянна трымаць раўнавагу) і ногі (яны ж знаходзяцца без руху ў адным становішчы). І ўсё гэта даводзіцца трываць чалавеку ва ўзросце.
Да таго ж паломнік выконвае пост, на працягу дзевяці дзён нічога не есць, а п'е толькі ваду. Дарэчы, аб вадзе. У якім бы населеным пункце ён ні спыніўся, каб выпіць вады, усюды яго гасцінна сустракаюць мясцовыя жыхары.
— Выходзяць, вітаюць, просяць благаславіць, — працягвае А. Кабяк. — Многія кіроўцы, абганяючы, прытарможваюць, фатаграфуюць нас. Пробашч пры гэтым знаходзіць магчымасць іх благаславіць.
Раніцай 2 ліпеня ксёндз Уладзіслаў працягнуў свой маршрут. Заключны адрэзак шляху складзе прыкладна 23 км. У Будслаў ён планаваў прыбыць каля 11:00.
Каментары