«Samym składanym byŭ aŭtorak, kali liŭ mocny doždž»: ksiondz Uładzisłaŭ Zavalniuk dabraŭsia na monakole ź Minska ŭ Budsłaŭ FOTA

Probašč Čyrvonaha kaścioła, 70-hadovy ksiondz-kanonik Uładzisłaŭ Zavalniuk ździajśniaje 4-dzionnuju 132-kiłamietrovuju adzinočnuju pilihrymku ź Minska ŭ Budsłaŭ. Tam siońnia, 2 lipienia, adznačajuć śviata Budsłaŭskaj ikony Božaj Maci. Praz pandemiju pilihrymki vialikimi hrupami admienienyja. Tamu ksiondz Uładzisłaŭ vyrašyŭ adpravicca tudy samastojna. U jakaści transpartnaha srodku abraŭ monakoła, jaździe na jakim navučyŭsia nie tak daŭno, pišuć Minsk-naviny.

Pierad adjezdam 29 červienia ŭ Čyrvonym kaściole prajšła imša. Pravodzić ksiandza pryjechali kala 30 čałaviek z monakołami. Za haradskoj rysaj śviatar pierasoŭvajecca na monakole ŭ adzinočku, ale jaho supravadžaje lehkavy aŭtamabil.

Pavialičyć

Zahadčyca haspadarkaj Čyrvonaha kaścioła Alena Kabiak raspaviała «Minsk-navinam»:

— Zrabili prypynak u Daŭhinavie, probašč adpačyvaje, - raspaviała jana. — Siońnia (1 lipienia) prajšli 22 km. U pieršy dzień, jak vypravilisia ź Minska, prajechali ad MKAD adrezak na 31 km. Nadvorje było niadrennaje, śviaciła sonca. Ciažkim vydaŭsia aŭtorak, 30 červienia, kali ranicaj liŭ mocny doždž.

Ujaŭlajecie, u našaj mašynie zalivaje łabavoje škło vadoj, a ksiondz Uładzisłaŭ jedzie na monakole.

Jaho žoŭty płašč choć ličycca niepramakalnym, ale ŭsio ž… a tut jašče razhulaŭsia mocny viecier, dy tak, što staraŭsia sarvać nas z darohi. Ale potym nadvorje palepšyłasia.

Pa słovach A. Kabiak, probašč ruchajecca z chutkaściu prykładna 25 km/h, praz 5-7 km robić prypynak, adpačyvaje 15-20 chvilin i jedzie dalej.

Pavialičyć

U šlachu pravodzić imšu i abrad adaracyi.

Jechać na monakole na vialikuju dystancyju niaprosta: mocna stamlajucca śpina (treba pastajanna trymać raŭnavahu) i nohi (jany ž znachodziacca biez ruchu ŭ adnym stanoviščy). I ŭsio heta davodzicca tryvać čałavieku va ŭzroście.

Da taho ž pałomnik vykonvaje post, na praciahu dzieviaci dzion ničoha nie jeść, a pje tolki vadu. Darečy, ab vadzie. U jakim by nasielenym punkcie jon ni spyniŭsia, kab vypić vady, usiudy jaho haścinna sustrakajuć miascovyja žychary.

Pavialičyć

— Vychodziać, vitajuć, prosiać błahasłavić, — praciahvaje A. Kabiak. — Mnohija kiroŭcy, abhaniajučy, prytarmožvajuć, fatahrafujuć nas. Probašč pry hetym znachodzić mahčymaść ich błahasłavić.

Ranicaj 2 lipienia ksiondz Uładzisłaŭ praciahnuŭ svoj maršrut. Zaklučny adrezak šlachu składzie prykładna 23 km. U Budsłaŭ jon płanavaŭ prybyć kala 11:00.

• 0
• 0
• 0
• 0
• 0
• 0
• 0
• 0