Katalicki fest u Budsłavie ŭpieršyniu prajšoŭ z udziełam kiraŭnika BPC i pasła Rasii
U Nacyjanalnym sanktuaryi ŭ Budsłavie 2—4 lipienia prajšli tradycyjnyja ŭračystaści ŭ honar Maci Božaj Budsłaŭskaj. Sioletni fest adznačyŭsia rekordnaj kolkaściu pilihrymaŭ, a taksama niezvyčajnym dla katalickaha śviata składam aficyjnych haściej, siarod jakich upieršyniu byli kiraŭnik Biełaruskaj pravasłaŭnaj carkvy i pasoł Rasii.
Jak paviedamlaje telehram-kanał «Chryścijanskaja vizija» sa spasyłkaj na pryvitalnuju pramovu mitrapalita Minska-Mahiloŭskaha archibiskupa Iosifa Stanieŭskaha,
hałoŭnaja śviataja imša 4 lipienia prajšła z udziełam kiraŭnika BPC mitrapalita Vienijamina. Akramia jaho, na nabaženstvie prysutničali lidary iudziejskaj i isłamskaj kanfiesij, rasijski pasoł Barys Hryzłoŭ i inšyja dypłamaty.
Dziaržaŭny aparat pradstaŭlali namieśnik Upaŭnavažanaha pa spravach relihij i nacyjanalnaściej Siarhiej Hierasimienia, kiraŭnictva Miadzielskaha rajvykankama, a taksama pradstaŭniki praŭładnych hramadskich abjadnańniaŭ — «Biełaruskaha sajuza žančyn» i Fondu miru.
Mitrapalit Minska-Mahiloŭski archibiskup Iosif Stanieŭski. Fota: catholic.by
Imša apoŭnačy ŭ Budsłavie. Fota: catholic.by
Aŭtary kanała adznačajuć, što taki farmat źjaŭlajecca demanstracyjaj «adzinstva» kanfiesij i dziaržavy, što stała novym trendam, pradyktavanym uładami.
U svajoj propaviedzi archibiskup Stanieŭski padkreśliŭ, što z hetaha hoda Budsłaŭ aficyjna staŭ «duchoŭnym centram», i adznačyŭ, što taki status jamu prysvojeny pa inicyjatyvie Alaksandra Łukašenki. Ijerarch ahučyŭ tezis pra toje, što «Kaścioł i dziaržava — heta siamja siemjaŭ», i padziakavaŭ kiraŭnictvu krainy za finansavuju padtrymku. Pavodle jaho słoŭ, dasiahnuta damoŭlenaść ab finansavańni restaŭracyi budsłaŭskaha kaścioła paśla pažaru na parytetnych umovach: 50% vydatkaŭ biare na siabie dziaržava, jašče 50% — Kaścioł. U chramie ŭžo adkryty muziej, a ŭ pierśpiektyvie płanujecca pabudavać Dom pilihryma.
Zhodna ź niadaŭnim ukazam Alaksandra Łukašenki ab padtrymcy «duchoŭnych centraŭ», ź dziaržaŭnaha biudžetu na restaŭracyju pravasłaŭnaha sabora ŭ Žyrovičach było vydzielena 3,4 młn rubloŭ, a na ramontnyja raboty ŭ katalickim kaściole ŭ Budsłavie — kala 260 tysiač rubloŭ. Pažar u Nacyjanalnym sanktuaryi, jaki mocna paškodziŭ dach chrama, adbyŭsia 11 maja 2021 hoda.
Niahledziačy na aficyjoz, hałoŭnymi ŭdzielnikami śviata zastalisia vierniki. Pavodle aficyjnaj statystyki, jakuju ahučyli paśla nabaženstvaŭ, sioleta ŭ Budsłaŭ prybyli 2680 pilihrymaŭ z roznych kutkoŭ Biełarusi, pieraadoleŭšy pieššu ahułam 2717 kiłamietraŭ. Siarod ich — 114 siemjaŭ z 150 dziećmi. Samamu małodšamu pilihrymku, jakoha baćki prynieśli ź Minska za piać dzion, spoŭniłasia ŭsiaho 26 dzion. Najstarejšamu ŭdzielniku piešych pachodaŭ — 78 hadoŭ. Taksama ŭ Budsłaŭ prybyła pieršaja pilihrymka na monakołach z 15 čałaviek, jakaja prajechała pa maršrucie Daŭhinava — Budsłaŭ.
Varta adznačyć, što 3 lipienia, u dzień aficyjnaha dziaržaŭnaha śviata — Dnia Niezaležnaści — u Budsłavie taksama hučali malitvy za Biełaruś, a apoŭdni, jak i va ŭsich pravasłaŭnych chramach krainy, adbyŭsia śviatočny zvon zvanoŭ.
Budsłaŭski fest, jaki ŭniesieny ŭ śpis niemateryjalnaj kulturnaj spadčyny JUNIESKA, sioleta prachodziŭ pad devizam «Słava Bohu — Spadziavajsia na Maryju — Viernaść kaściołu» i byŭ prymierkavany da 35‑hodździa adnaŭleńnia struktur Katalickaj carkvy ŭ Biełarusi.
Ciapier čytajuć
35‑hadovy dalnabojščyk ź Biełarusi raptoŭna pamior u Kitai. Heta muž samaj tytułavanaj biełaruskaj dziudaistki1
Kamientary