Na BMW ź niamieckimi numarami, rasijskim i savieckim ściahami i kryžami: pryhody rasijanina, jaki jechaŭ z Hiermanii praź Biełaruś
Rasijanin, jaki z 1999 hoda žyvie ŭ Hiermanii, pajechaŭ u Rasiju praź Biełaruś i trapiŭ adrazu ŭ niekalki pryhod.
Poŭny kamplekt patryjatyzmu
BMW X7, na jakim Uładzimir pajechaŭ z Hiermanii ŭ Maskvu, bolš padobny na rekłamna-patryjatyčny biłbord, čym na transpartny srodak.
Na kapocie aŭtamabila — rasijski ściah z hierbam, na voknach ź levaha boku taksama rasijski trykałor. Na zadnim škle — hierb SSSR, a na voknach pa pravym baku — saviecki ściah. Razbaŭlajuć uvieś hety nabor dva pravasłaŭnyja kryžy, naleplenyja na piarednija dźviery. I ŭsio heta na BMW ź niamieckimi rehistracyjnymi znakami.
Razumiejučy, što z takim naboram praz Łatviju i Litvu jechać nie varyjant, bo tam savieckaja simvolika zabaroniena naraŭnie z nacysckaj, mužčyna zalapiŭ usio, aproč kryžoŭ, čornaj plonkaj, kali byŭ u Kalininhradskaj vobłaści.
Sproba numar 1
Trapić u Biełaruś praź Litvu ŭ mužčyny nie atrymałasia. Ź Litvy jaho nie vypuskali praz toje, što jahonaja mašyna sankcyjnaja.
«Cipa kaštuje šmat, vialiki abjom ruchavika, mašyna novaja… «My adkaznaść brać nie budziem, navat kali vy ŭłaśnik abo jana aformlenaja ŭ vas na firmu». Roźnicy niama, nie vypuskajuć», — tłumačyŭ mužčyna ŭ videa ź miažy.
Hadzinu jon zmahaŭsia ź litoŭcami, kazaŭ, što niadaŭna byŭ u Kalininhradzie, i, maŭlaŭ, Polšča biez prablem vypuściła hetaje aŭto. Ale nijakija arhumienty nie dapamahli, tamu jon byŭ vymušany jechać nazad i sprabavać dabracca da Minska ŭžo praz Polšču.
56 tysiač jeŭra — i zajazdžaješ
Dla zajezdu ŭ Biełaruś jon abraŭ nie najbližejšy da Litvy punkt propusku «Bruzhi» ci krychu dalejšuju «Bierastavicu», a «Brest».
«Polšča, dziakuj bohu, vypuskaje biez prablem, ja prajšoŭ [polskuju miažu] bieź pieraškod», — dałažyŭ Uładzimir.
A voś na biełaruskim baku ŭsio było nie tak hładka.
Mužčyna patłumačyŭ, što nibyta ciapier u Biełarusi ŭviali zakon, što hramadzianie Rasii pavinny pierasiakać miažu tolki z unutranym pašpartam, dzie jość prapiska. Inakš daviadziecca pakidać na miažy załoh (finansavuju harantyju) za aŭto na zamiežnaj rehistracyi ŭ pamiery 100% sumy myta. Uładzimir takoha nie mieŭ, tolki zamiežny pašpart, bo žyvie ŭ Hiermanii z 1999 hoda, kali jaho vyvieźli tudy jašče dziciem.
Pačatkova ž, pa słovach Uładzimira, na biełaruskaj miažy jamu prapanavali pakinuć finansavuju harantyju na sumu kala 56 tysiač jeŭra.
«Ale, dziakuj bohu, tam była mahčymaść damovicca i vyrašyć hetaje pytańnie», — kaža jon. Mužčyna napisaŭ na biełaruskaj mytni tłumačalnuju zajavu, što jon vyjechaŭ z Rasii jašče ŭ 1999 hodzie i nikoli nie mieŭ unutranaha rasijskaha pašparta.
Usia pracedura z tłumačeńniami i afarmleńniem časovaha ŭvozu na niamieckaje aŭto ŭ rasijanina zaniała kala 5‑6 hadzin.
Mužčyna kaža, što prablem ź pierasiačeńniem miažy niama, i ŭsim raić pierachod «Brest».
Što da viartańnia, to ŭ tym ža videa Uładzimir paviedamiŭ, što, mahčyma, pajedzie praź Litvu ŭ spadzievie na toje, što jamu trapiacca tyja samyja litoŭcy, jakija nie vypuścili jaho ź Litvy ŭ Biełaruś.
Ale na hetym pryhody rasijanina z Hiermanii ŭ Biełarusi nie skončylisia.
Mužčyna pieravysiŭ chutkaść na trasie, paśla čaho daišniki vysačyli jaho BMW pa kamierach i vypisali štraf. Sa słoŭ padarožnika, pieravyšeńnie skłała ŭsiaho 15 kiłamietraŭ na hadzinu.
Ale heta jašče drobiazi ŭ paraŭnańni z tym, jak rasijanin haniaŭ pa Minsku.
Na roliku vidać, jak, ruchajučysia pa praśpiekcie Niezaležnaści, u rajonie cyrka mužčyna vyjazdžaje ŭ krajniuju levuju pałasu, dzie razhaniajecca ažno da 103 km/h. Chutkaść možna pabačyć na prajekcyi na łabavym škle.
Minsk rasijaninu vielmi padabajecca, jak i Łukašenka.
«Minsk — pryhažość. «Baćka» — supierkłas».
Amatar chutkaj jazdy
Tolki vyjechaŭšy ź ES, mužčyna źniaŭ čornyja plonki, jakija zakryvali rasijskuju i savieckuju simvoliku, tamu pa Biełarusi jon haniaŭ na svajoj Ch7 užo ŭ poŭnym kamuflažy.
Pry hetym vyhladaje, što pieravyšać chutkasny režym dla jaho — heta norma.
Kali rasijanin naładziŭ u navihatary šlach ź Minska ŭ Maskvu, na videa bačna, što jon razhaniajecca pa trasie da 140—143 km/h.
Pahaniaŭšy pa Biełarusi, Uładzimir napaśledak nabyŭ sabie dźvie kanistry.
«Pierad miažoj z Rasijaj nabyŭ u Biełarusi dźvie kanistry pa 20 litraŭ. Ciapier budu zapraŭlać, i potym sa mnoju buduć 40 litraŭ dyzielu», — vychvalaŭsia jon u storys.
Ciapier čytajuć
Biełarusu na 100 hadoŭ zabaranili ŭjezd u Rasiju — za ŭdzieł u minskich maršach 2020 hoda2
Kamientary