Redki rasijski «latajučy radar» sarvaŭ ataku ŭkrainskich «Fłaminha» na zavod «Iskanderaŭ»
U noč na 4 lipienia Ukraina zapuściła piać kryłatych rakiet «Fłaminha» pa stratehičnym zavodzie ŭ hłybini Rasii. Adnak usie jany byli źbityja. Pośpiech rasijskaj SPA zabiaśpiečyŭ redki samalot dalokaha radyjołakacyjnaha vyjaŭleńnia A-50U, jaki zmoh zafiksavać rakiety tam, dzie naziemnyja radary byli b ślapyja.
Ukrainskija Uzbrojenyja siły ažyćciavili zapusk prynamsi piaci kryłatych rakiet FP-5 «Fłaminha» pa terytoryi Rasijskaj Fiederacyi. Imaviernaj cellu ŭdaru byŭ Votkinski zavod va Udmurcii, jaki śpiecyjalizujecca na vytvorčaści rakiet dla apieratyŭna-taktyčnych kompleksaŭ «Iskander». Usie ŭkrainskija rakiety byli pierachoplenyja, paviedamlaje ŭkrainski manitorynhavy telehram-kanał «KibierBorošno».
Zhodna z dadzienymi sistemy OCHI AI, palot rakiet doŭžyŭsia pryblizna z 1:10 da 3:00 nočy. Maršrut byŭ prakładzieny na zvyšnizkich vyšyniach uzdoŭž raki Vołha z vykarystańniem składanaha reljefu miascovaści dla maksimalnaj nieprykmietnaści. Paśla prachodžańnia kalidora na Vałhahrad rakiety nakiravalisia na Uljanaŭsk, a zatym zrabili kruk praz Čuvašyju, kab paźbiehnuć vyjaŭleńnia.
Niahledziačy na składany maršrut, usie rakiety byli źbityja. Pieršyja pierachopy adbylisia ŭ rajonie rasijskich haradoŭ Enhiels i Bałakova. Častka rakiet była źniščana avijacyjaj pry paŭtornym vychadzie na Vołhu ŭ kirunku Kazani. Apošniuju rakietu, jakaja dalacieła niepasredna da Votkinska, źniščyŭ užo naziemny zienitna-rakietny kompleks.
Klučavym faktaram paśpiachovaha adbićcia ataki staŭ svoječasovy ŭzdym u pavietra rasijskaha samalota dalokaha radyjołakacyjnaha vyjaŭleńnia (DRŁV) A-50U.
Prykładna za paŭhadziny da padychodu rakiet bort pačaŭ patrulavańnie ŭ rajonie Uljanaŭskaj i Samarskaj abłaściej, a taksama Baškartastana. Heta dazvoliła rasijskim vajskoŭcam zafiksavać rakiety, jakija išli na nizkich vyšyniach nad rekami i pahorysta-lasistaj miascovaściu, dzie naziemnyja RŁS tradycyjna majuć «ślapyja zony».
Jak adznačaje telehram-kanał In Factum, paśpiachovaje vykarystańnie A-50U dla naviadzieńnia srodkaŭ SPA padkreślivaje krytyčnuju nieabchodnaść dla Ukrainy źniščać rasijskija samaloty DRŁV, jakija zastalisia ŭ strai.
Pavodle acenak kanała, da pačatku poŭnamaštabnaj vajny Rasija mieła kala 10 samalotaŭ A-50 i A-50U. Dva ci try barty byli źniščanyja ŭkrainskimi siłami, jašče niekalki ličacca niefunkcyjanalnymi. Na siońnia ŭ składzie Pavietrana-kaśmičnych sił Rasii zastajecca kala 5 bajazdolnych mašyn hetaha typu, jakija źjaŭlajucca nadzvyčaj deficytnym resursam, što nie padlahaje chutkamu adnaŭleńniu.
Kamientary