Zialenski adstaŭlaje papularnaha maładoha ministra abarony. U taho nie było ŭzajemarazumieńnia z Syrskim

Michaił Fiodaraŭ byŭ ministram abarony ŭsiaho paŭhoda — z 14 studzienia 2026 hoda, a da taho zajmaŭ pasadu ministra ličbavaj transfarmacyi. Ale navat za taki karotki termin, pa słovach Fiodarava, udałosia dasiahnuć šerahu važnych vynikaŭ.

Adnoj z hałoŭnych padziej, jakija adbylisia padčas jahonaha kiravańnia ministerstvam abarony, jon nazvaŭ adklučeńnie rasijskich vojskaŭ ad sistemy Starlink, što, pa jaho słovach, značna źniziła ich mahčymaści efiektyŭna vykarystoŭvać bieśpiłotniki.

Fiodaraŭ paviedamiŭ, što Ministerstva abarony atrymała ŭ spadčynu biudžetnyja ciažkaści, adnak było pryniata rašeńnie vykarystać srodki, pieršapačatkova pryznačanyja dla hrašovaha zabieśpiačeńnia vajskoŭcaŭ u kancy hoda, i nakiravać ich na zakupku roznych vidaŭ sučasnych bieśpiłotnych sistem. Siarod ich — udarnyja drony siaredniaj dalokaści, FPV-drony na vałakonna-aptyčnym kiravańni, tannyja raźviedvalnyja bieśpiłotniki, naziemnyja rabatyzavanyja kompleksy, drony-pierachopniki i dalokabojnyja ŭdarnyja drony. Pavodle jaho słoŭ, za čatyry miesiacy było zakuplena bolš bieśpiłotnikaŭ, čym za ŭvieś papiaredni hod.

Fiodaraŭ taksama adznačyŭ zapusk prahramy «Łahistyčny łakdaŭn», jakaja atrymała asobnaje finansavańnie. Jon śćviardžaje, što dziakujučy hetaj prahramie, pravilnym zakupkam i padtrymcy najbolš bajazdolnych padraździaleńniaŭ udałosia istotna ŭskładnić łahistyku rasijskich vojskaŭ i pačać izalacyju Kryma. Akramia hetaha, praciahvałasia finansavańnie prahramy «Linija dronaŭ», jakaja zabiaśpiečvaje zakupku bieśpiłotnikaŭ dla Sił bieśpiłotnych sistem, a taksama była stvorana prahrama padtrymki sučasnych šturmavych padraździaleńniaŭ, što robiać staŭku na vysokija technałohii.

Jašče adnym važnym napramkam jon nazvaŭ reformu sistemy dziaržaŭnych zakupak. Była ŭviedziena mahčymaść pieradapłaty ŭ pamiery 70 pracentaŭ pry zakupkach praz płatformu Brave1 Market, arhanizavanyja pieršyja adkrytyja tendary na zakupku dalokabojnaj artyleryi i sotniaŭ tysiač bieśpiłotnikaŭ. Na jaho dumku, heta dazvoliła dziaržaŭnamu biudžetu aščadzić miljardy dalaraŭ. Taksama ŭpieršyniu praz tendary byli zakuplenyja tysiačy pikapaŭ, bahi i kvadracykłaŭ dla patreb vojska.

Fiodaraŭ paviedamiŭ pra źmieny ŭ pracy supraćpavietranaj abarony. Pavodle jaho infarmacyi, ciapier paśla kožnaj masiravanaj pavietranaj ataki pačali pravodzicca śpiecyjalnyja razbory dziejańniaŭ. Jon śćviardžaje, što dziakujučy hetamu ŭzrovień pierachopu bieśpiłotnikaŭ pavialičyŭsia z 83 da 91 pracenta, a kryłatych rakiet — z 47 da 87 pracentaŭ. Akramia taho, byli ŭpieršyniu zaklučanyja kantrakty na zakupku rakiet Patriot PAC-2 GEM-T i padadziena zajaŭka na finansavańnie zakupki rakiet PAC-3 za košt jeŭrapiejskaha kredytu.

Jon taksama adznačyŭ stvareńnie sistemy bazavaha zabieśpiačeńnia bajavych bryhad i karpusoŭ bieśpiłotnikami. Pavodle jaho słoŭ, pačynajučy ź lipienia ŭsie bajavyja padraździaleńni pavinny atrymlivać pradkazalnyja pastaŭki dronaŭ biez ručnoha ŭmiašańnia, što dazvolić lepš płanavać bajavyja dziejańni.

Siarod inšych dasiahnieńniaŭ jon nazvaŭ zapusk hrantavaj prahramy dla vytvorcaŭ vybuchovych rečyvaŭ i rakiet, a taksama pačatak maštabnaj reformy vajskovaj słužby. Jana praduhledžvaje kantrakty dla ŭsich vajskoŭcaŭ z vyrazna vyznačanymi terminami słužby i adterminoŭkami, pavyšeńnie apłaty pracy piachoty i šturmavych padraździaleńniaŭ da adnaho z samych vysokich uzroŭniaŭ u śviecie, adkryćcio mahčymaści dla pryciahnieńnia zamiežnych rekrutaŭ i stvareńnie novych miechanizmaŭ viartańnia vajskoŭcaŭ, jakija samavolna pakinuli svaje padraździaleńni.

Fiodaraŭ paviedamiŭ, što za čas jaho kiraŭnictva byli praviedzienyja try pasiadžeńni mižnarodnaj kantaktnaj hrupy pa abaronie Ukrainy ŭ farmacie «Ramštajn». Pavodle jaho acenki, heta dapamahło źmianić nastroi mižnarodnych partnioraŭ i adnavić ich upeŭnienaść u zdolnaści Ukrainy supraćstajać ahresii. U vyniku była abvieščana padtrymka ŭ pamiery 40 miljardaŭ dalaraŭ na biahučy hod, nie ŭličvajučy asobnaha jeŭrapiejskaha kredytu. Taksama byŭ stvorany miechanizm vykarystańnia hetaha kredytu na pryjarytetnyja vajskovyja patreby krainy.

Asobna jon adznačyŭ raspracoŭku ŭkrainskaj balistyčnaj rakiety. Pavodle jaho słoŭ, mienavita ŭ dzień adstaŭki ŭrada adbylisia jaje paśpiachovyja vyprabavańni. Jon paviedamiŭ, što techničnaje zadańnie było istotna pierapracavana, udałosia značna pavysić dakładnaść i prykładna na 30 pracentaŭ źnizić košt raspracoŭki.

Taksama Fiodaraŭ zajaviŭ pra padpisańnie kantraktu na zakupku šviedskich źniščalnikaŭ Gripen, jakija pavinny dapamahčy źniščać rasijskija samaloty i nośbitaŭ kiravanych avijabombaŭ. Jon paviedamiŭ pra praviadzieńnie razam z vajskoŭcami apieracyi «Ašan», jakaja, pavodle jaho słoŭ, spyniła miechanizavany nastup rasijskich vojskaŭ prykładna na paŭhoda. Akramia hetaha, byli adkrytyja mahčymaści dla ekspartu ŭ ramkach prahramy Drone Deal z metaj pryciahnieńnia inviestycyj u abaronnuju pramysłovaść, stvorana łabaratoryja Trophy Lab dla vyvučeńnia rasijskich vajskovych technałohij razam z zamiežnymi partniorami i adkryty centr Defense AI Center A1 dla paskareńnia vykarystańnia štučnaha intelektu ŭ vajskovaj śfiery.

Razam z tym Fiodaraŭ pryznaŭ, što nie ŭsie pastaŭlenyja zadačy ŭdałosia vykanać. Pavodle jaho słoŭ, nie była zavieršana poŭnaja arhanizacyjnaja reforma Ministerstva abarony pavodle standartaŭ NATA. Choć novaja struktura ŭžo była stvoranaja, mnohija supracoŭniki zvolnienyja, a šerah reformaŭ raspačaty, jon ličyć, što nieabchodna było jašče bolš rašuča pazbaŭlacca ad ludziej, jakija tarmazili pieramieny.

Taksama jon adznačyŭ, što nie paśpieŭ pieravieści ŭsie dziaržaŭnyja zakupki na adkrytuju tendarnuju sistemu i nie zdoleŭ u poŭnaj miery sfarmavać kulturu asabistaj adkaznaści za pryniatyja rašeńni. Pry hetym jon vykazaŭ upeŭnienaść, što z časam takaja instytucyjnaja kultura budzie sfarmavanaja ŭkrainskim hramadstvam.

Naprykancy jon padkreśliŭ, što praciahnie pracavać nad raźvićciom technałahičnych i arhanizacyjnych mahčymaściej Ukrainy ŭ śfiery abarony.

Ukrainskija ŚMI pišuć sa spasyłkaj na insajdaraŭ, što pryčynaj adstaŭki Fiodarava stała jaho procistajańnie z hałoŭnakamandujučym ukrainskaj armijaj Alaksandram Syrskim.

• 11
• 2
• 3
• 5
• 2
• 5
• 5
• 0