Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski
Biełaruś apynułasia tam, dzie abmiarkoŭvajuć budučyniu biaśpieki śvietu.
Jašče niekalki hadoŭ tamu Biełaruś na mižnarodnych kanfierencyjach najčaściej zhadvali ŭ suviazi z palityčnymi represijami, pravami čałavieka i palitviaźniami. Ale paśla pačatku poŭnamaštabnaj vajny Rasii suprać Ukrainy akcenty pastupova źmianiajucca. Pra Biełaruś usio čaściej havorać jak pra adzin z faktaraŭ jeŭrapiejskaj biaśpieki. Mienavita z takim pasyłam Śviatłana Cichanoŭskaja vystupiła na Aspen Security Forum — adnoj z najbolš aŭtarytetnych amierykanskich placovak, dzie abmiarkoŭvajuć nacyjanalnuju biaśpieku, mižnarodnuju palityku i hałoŭnyja hłabalnyja vykliki.
Na Aspen Security Forum z 2010 hoda źbirajucca dziejučyja i byłyja kiraŭniki śpiecsłužbaŭ, ministry abarony i zamiežnych spraŭ, hienierały, kanhresmieny, pradstaŭniki NATA, Jeŭrasajuza, analityčnych centraŭ i viadučych suśvietnych miedyja. Mienavita na hetaj placoŭcy časta ahučvajucca novyja padychody Vašynhtona i jaho sajuźnikaŭ da klučavych mižnarodnych kryzisaŭ. Tamu źjaŭleńnie Biełarusi ŭ paradku dnia takoj dyskusii samo pa sabie pakazalny sihnał.
Jak raskazaŭ «Našaj Nivie» daradca Śviatłany Cichanoŭskaj pa dypłamatyi i dyrektar Vilenskaha ofisa Dzianis Kučynski, heta śviedčyć pra važnuju źmienu ŭ tym, jak zachodnija partniory siońnia ŭsprymajuć biełaruskaje pytańnie.
«Heta byŭ pieršy raz, kali Śviatłana Cichanoŭskaja vystupiła na Aśpienskim forumie pa biaśpiecy. Heta vielmi važna i dla Biełarusi, bo biełaruskaje pytańnie ŭsio bolš usprymajecca nie tolki jak humanitarnaje, ale i jak pytańnie biaśpieki», — kaža Kučynski.
Biełaruś jak elemient biaśpieki Uschodniaj Jeŭropy
U panelnaj dyskusii razam sa Śviatłanaj Cichanoŭskaj udzielničali hienieralnaja sakratarka Jeŭrapiejskaj słužby źniešnich dziejańniaŭ Bielen Marcinies Karbanel, ministr abarony i źniešniaha handlu Bielhii Tea Frankien i ministr justycyi i biaśpieki Niderłandaŭ David van Veeł.
Asnoŭny pasył jaje vystupu zaklučaŭsia ŭ tym, što biaśpieka Jeŭropy niepasredna zaležyć ad taho, što adbyvajecca ŭ Biełarusi:
«My pavinny ŭžo ciapier hladzieć na Biełaruś pa-inšamu. Usprymać Biełaruś nie tolki jak humanitarny vypadak, ale i z punktu hledžańnia biaśpieki. Bo pakul Łukašenka słužyć Rasii, jon hatovy pradastaŭlać našu terytoryju i našu infrastrukturu dla napadaŭ na Ukrainu i patencyjna — na krainy NATA».
«Revalucyja, z majho punktu hledžańnia, była ŭ tym, što demakratyčny śviet narešcie ŭśviadomiŭ: stabilnaść niemahčyma kupić sastupkami dyktataram. Heta nikoli nie pracuje. Dyktataraŭ niemahčyma ŭłahodzić. Dyktataraŭ niemahčyma pieravychavać. Z dyktatarami možna tolki zmahacca — i Ukraina pakazała heta vielmi vyrazna. Heta, biezumoŭna, śviatło ŭ kancy tunela — kali my zachavajem adzinstva, kali budziem praciahvać dapamahać Ukrainie i inšym krainam, jakija zmahajucca za svaju niezaležnaść», — skazała padčas dyskusii Śviatłana Cichanoŭskaja.
Pavodle jaje, režym praciahvaje budavać novuju vajennuju infrastrukturu, jakaja śviedčyć pra padrychtoŭku da mahčymaj eskałacyi:
«Jany budujuć novuju infrastrukturu, jakoj nie pavinna być, kali kraina nie rychtujecca da eskałacyi. Kali my nie pazbavimsia hetaha režymu, pahroza z terytoryi Biełarusi budzie zastavacca pastajannaj. Demakratyčnaja i svabodnaja Biełaruś — u intaresach nie tolki biełarusaŭ ci ŭkraincaŭ, ale i jeŭrapiejcaŭ».
Pa słovach Dzianisa Kučynskaha, mienavita heta siońnia ŭsio lepš razumiejuć i zachodnija partniory:
«Padčas forumu Śviatłana padkreśliła, što pakul režym Łukašenki zastajecca instrumientam Kramla, pahroza z terytoryi Biełarusi budzie zachoŭvacca. Tamu demakratyčnaja Biełaruś — heta pytańnie biaśpieki ŭsioj Jeŭropy».
«Kali ŭdzielniki ŭbačyli Siarhieja, jamu apładziravali»
Asobnym simvaličnym momantam forumu stała prysutnaść Siarhieja Cichanoŭskaha.
Padčas svajho vystupu Śviatłana zhadała muža, jaki znachodziŭsia ŭ zale.
«Kali ŭdzielniki ŭbačyli, što Siarhiej znachodzicca ŭ zale, jamu apładziravali. Heta byŭ vielmi kranalny momant. Mnohija mižnarodnyja partniory ŭ ZŠA ŭpieršyniu paśla jaho vyzvaleńnia ŭbačyli Śviatłanu i Siarhieja razam», — raskazvaje Kučynski.
Pavodle jaho, padčas forumu Siarhiej Cichanoŭski amal uvieś čas znachodziŭsia razam sa Śviatłanaj:
«Praktyčna ŭvieś čas, amal kožnuju chvilinu, Siarhiej byŭ razam sa Śviatłanaj, padtrymlivaŭ jaje. Było vielmi pryjemna bačyć ich pobač».
Jon kaža, što za apošnija tydni Siarhiej prykmietna adaptavaŭsia da žyćcia paśla vyzvaleńnia:
«Što da jaho asabista, to jon krok za krokam viartajecca da narmalnaha žyćcia. Maje šmat idej i płanaŭ u roznych halinach. Vidać, što jon vykarystoŭvaje čas paśla vyzvaleńnia i dla samaraźvićcia — naprykład, padciahnuŭ anhlijskuju movu. Jon małajčyna ŭ hetym sensie, vielmi mocny i niazłomny čałaviek».
Kučynski adznačaje, što, niahledziačy na bolš čym piać hadoŭ za kratami, Cichanoŭski nie straciŭ svajoj enierhii:
«Jon, jak zaŭsiody, byŭ u badziorym nastroi. Jak ni kruci, Siarhiej Cichanoŭski zastajecca adnym z hałoŭnych simvałaŭ i hierojem biełaruskaha 2020 hoda. Ja staŭlusia da jaho z pavahaj. My abmierkavali niekalki idej — dzieści pahadzilisia, dzieści paspračalisia. Heta absalutna narmalna i, na maju dumku, navat karysna».
Na palach forumu dziakavali ZŠA za vyzvaleńnie palitviaźniaŭ
Aspen Security Forum staŭ dla biełaruskaj delehacyi jašče i placoŭkaj dla šerahu sustreč.
Pavodle Kučynskaha, Śviatłana i Siarhiej Cichanoŭskija sustrelisia z byłoj dziaržsakratarkaj ZŠA Kandalizaj Rajs, byłym namieśnikam dziaržsakratara ZŠA Styvam Bihanam, žurnalistam CNN Džymam Šuta i inšymi amierykanskimi palitykami, ekśpiertami i pradstaŭnikami miedyja.
«Heta taksama była dobraja mahčymaść jašče raz padziakavać prezidentu Donaldu Trampu i śpiecyjalnamu prezidenckamu pasłańniku Džonu Koŭłu za ich namahańni, jakija dapamahli vyzvaleńniu biełaruskich palitviaźniaŭ», — padkreśliŭ Dzianis Kučynski.
Ciapier čytajuć
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski2
Kamientary