Kitajski startap vypuściŭ ŠI-madel, jakaja abyšła amierykanskija anałahi

Kitajskija AI-łabaratoryi zdolnyja kankuravać z amierykanskimi ŭ adnoj z klučavych technałahičnych śfier.

Piekinski startap paviedamiŭ u piatnicu, što da kanca miesiaca płanuje całkam adkryć kod madeli — heta značyć, luby achvotny zmoža biaspłatna spampavać jaje i dapracoŭvać pad svaje patreby. Kimi K3 maje 2,8 tryljona paramietraŭ, što, jak śćviardžaje kampanija, robić jaje najbujniejšaj adkrytaj AI-madellu ŭ śviecie, piša The Wall Street Journal.

Što takoje paramietry AI-sistemy i čamu heta važna

Paramietry ŭ AI-sistemie pracujuć prykładna jak niejrony mozhu: čym ich bolš, tym bolš viedaŭ zdolnaja zachavać madel, tamu ich kolkaść časta vykarystoŭvajuć jak umoŭny pakazčyk mahutnaści. Adny kampanii raskryvajuć hetyja ličby publična, inšyja — nie. Anthropic, naprykład, nie abnarodavała kolkaści paramietraŭ svaich madelaŭ, choć, pavodle acenak starońnich daśledčykaŭ, u Claude Opus 4.8, vypuščanaj u mai, ich bolš za 1,5 tryljona.

Reliz Moonshot staŭ niečakanaściu dla mnohich u Kramianiovaj dalinie i paćviardžaje mierkavańnie, što kitajskija łabaratoryi nastupajuć na piatki amierykanskim kankurentam. Niezadoŭha da hetaha piekinskaja kampanija Z.AI prezientavała svaju madel GLM-5.2, jakaja ŭ šerahu testaŭ, asabliva ŭ prahramavańni, apiaredziła niekalki viadučych amierykanskich sistem.

Pavodle danych, dadzienych samoj Moonshot, Kimi K3 abyšła Opus 4.8 ad Anthropic i GPT 5.5 ad OpenAI u bolšaści testaŭ na prahramavańnie i aŭtanomnyja dziejańni AI-ahientaŭ. Praŭda, da najlepšych zakrytych amierykanskich madelaŭ — Fable 5 i GPT-5.6 Sol — kitajskaja raspracoŭka pakul nie daciahvaje.

Analityki Jefferies nazvali hety reliz «niečakanym praryvam» i miarkujuć, što jon padšturchnie dalejšyja inavacyi va ŭsioj halinie.

U ŠI ZŠA abhaniaje Kitaj na «šeść-dzieviać miesiacaŭ»

Chutki prahres Kitaja ŭ śfiery štučnaha intelektu tłumačycca namahańniami Piekina dasiahnuć technałahičnaj samadastatkovaści ŭ kankurencyi z ZŠA za lidarstva ŭ hetaj śfiery.

Na adnoj z kanfierencyj u sieradu kiraŭnik napramku nacyjanalnaj biaśpieki Anthropic Tarun Čchabra zajaviŭ, što adryŭ ZŠA ad kitajskich łabaratoryj u AI-madelach ciapier składaje «pryblizna ad šaści da dzieviaci miesiacaŭ». Pry hetym Anthropic raniej abvinavačvała šerah kitajskich łabaratoryj, u tym liku Moonshot i Z.AI, u vykarystańni amierykanskich madelaŭ dla navučańnia ŭłasnych sistem.

Kitajskija AI-madeli nabyvajuć papularnaść va ŭsim śviecie jašče i tamu, što mnohija ź ich — z adkrytym kodam, a taksama zvyčajna abychodziacca tańniej u ekspłuatacyi, čym zachodnija anałahi.

Chto inviestavaŭ u Moonshot

Siarod inviestaraŭ Moonshot — vienčurny fond HSG i technałahičny hihant Alibaba. Kampanija ŭžo pačała padrychtoŭku da pieršasnaha publičnaha raźmiaščeńnia akcyj (IPO) u Hankonhu.

Moonshot, pavodle krynic, znajomych ź situacyjaj, u ramkach ciapierašniaha raŭnda finansavańnia aceńvajecca na 31,5 miljarda dalaraŭ.

• 0
• 1
• 3
• 1
• 2
• 0
• 1
• 0