U Krymie pjanaja rasijskaja palicejskaja naśmierć źbiła biełarusa — i ŭciakła ź miesca avaryi
U miescy, dzie stajaŭ znak abmiežavańnia chutkaści da 40 km/h, 25‑hadovaja śledčaja lacieła kala 90 km/h. I dalatałasia.
1 lipienia 2023 hoda 45‑hadovy biełarus-budaŭnik, jaki bolš za siem hadoŭ jeździŭ na zarobki ŭ Rasiju, a taksama ŭ akupavany Krym, razam z dvuma kalehami pajšoŭ uviečary ŭ kramu pa cyharety. Jany išli pa abočynie darohi Znamienskaje-Dalokaje-Piasčany karjer, kala pasiołka Čarnamorskaje na samym zachadzie paŭvostrava.
U toj ža viečar staršaja śledčaja palicyi Kryma Natalla Hamola adpačyvała ź siabroŭkaj na mory niepadalok, u pasiołku Akunioŭka. Dniom jany vypili na dvaich butelku šampanskaha na plažy. Kala dziasiataj viečara Hamola sieła za rul baćkavaha «ZAZ Šans» i pajechała ź siabroŭkaj u kramu — pa darozie, dzie jakraz išoŭ ramont i dziejničała abmiežavańnie chutkaści 40 km/h.
Ekśpiertyza potym vyznačyła: jaje aŭtamabil jechaŭ z chutkaściu kala 90 km/h. Ubačyŭšy mužčyn u śviatle far, jana nie prytarmaziła. Udar byŭ taki mocny, što biełarusa adkinuła na 10‑15 mietraŭ napierad pa darozie. Palicejskaja nie spyniłasia — prajechała jašče kala 300 mietraŭ, pryparkavała paškodžany aŭtamabil kala kramy i razam ź siabroŭkaj pajšła pieššu, sprabujučy schavacca, pakul na ich vypadkova nie natknulisia supracoŭniki miascovaha DAI.
Biełarus pamior na miescy ad mnostva paškodžańniaŭ — pierałomy rebraŭ i chrybietnika, razryŭ aorty, čerapna-mazhavaja traŭma. Ekśpiertyza ałkatestu pakazała ŭ Hamoli 0,83 pramile — amal udvaja vyšej za dapuščalnuju normu. Pry aficyjnym miedaśviedčańni paźniej zafiksavali 0,55 pramile. Pavodle śviedak-palicejskich, jana niekalki razoŭ sprabavała sfalsifikavać vyniki testu.
U sudzie Hamola pryznała vinu tolki častkova: śćviardžała, što nie bačyła nijakich darožnych znakaŭ, što ałkaholu nie adčuvała, i što spyniłasia, jak tolki zmahła, — a potym prosta šukała miesca dla parkoŭki. Śviedki i videazapisy z kamier nazirańnia hetuju viersiju nie paćvierdzili.
Čarnamorski rajonny sud Kryma pryznaŭ palicejskuju vinavataj u zabojstvie čałavieka pa nieaściarožnaści kiroŭcam u niećviarozym stanie z pakidańniem miesca DTZ i pryznačyŭ 6 hadoŭ. Praŭda, nie ŭ kałonii, a ŭ kałonii-pasieliščy, dzie režym značna miakčejšy: asudžanyja mohuć svabodna pieramiaščacca pa terytoryi i navat pracavać zvonku.
Były ministr kultury Rusłan Čarniecki znajšoŭ sabie padpracoŭku9
Kamientary