Bank u Polščy zabłakavaŭ rachunki — a tam ipateka, i źbieražeńni. Ajcišnik-biełarus baicca stracić kvateru

Bank Pekao S.A. zabłakavaŭ tranzakcyi IT-śpiecyjalista Siarhieja, bo ciapier jon čakaje čarhovy dazvoł na žycharstva i nie moža pakazać aktualnuju kartu. Ciapier na jaho rachunkach — u tym liku aščadnym — adlustroŭvajecca «nul», piša telehram-kanał Zloty dzik.

U hetym ža banku ŭ biełarusa aformlena ipateka, vypłaty pa jakoj jon nie moža rabić. Bank pahražaje spynić supracoŭnictva (što mienavita heta aznačaje — pakul niezrazumieła).

U Polščy Siarhiej znachodzicca z 2022 hoda, čakaje druhuju Blue Card u Hdańsku (a tam navat na zdymańnie adbitkaŭ palcaŭ vyklikajuć praz 6 i bolš miesiacaŭ paśla padačy dakumientaŭ).

Historyja Siarhieja pačałasia 18 maja 2026 hoda, kali bank Pekao S.A., spasyłajučysia na zakon ab supraćdziejańni admyvańniu hrošaj i finansavańniu teraryzmu (AML), zapatrabavaŭ u jaho dakumient, jaki paćviardžaje zakonnaść znachodžańnia ŭ Polščy.

Siarhiej pryjechaŭ u krainu ŭ studzieni 2022 hoda ź Biełarusi, pracuje IT-śpiecyjalistam i ciapier žyvie ŭ Hdańsku. U banku Pekao u jaho aformleny ipatečny kredyt i adkryty aščadny rachunak, na jakim znachodzicca kala 50 tysiač złotych (11,5 tysiač jeŭra).

U śniežni 2025 hoda jon padaŭ dakumienty na atrymańnie karty pobytu i da hetaha času čakaje vykliku na zdaču adbitkaŭ palcaŭ. Na rukach u Siarhieja jość tolki papiarovaje paćviardžeńnie sa štampam ab pryniaćci zajavy, jakoje vydali ŭ Pamorskim vajavodstvie, ale bank jano nie zadavoliła.

28 maja Siarhiej pryjšoŭ u adździaleńnie banka, kab supracoŭniki zrabili kopiju hetaha štampa, ale na nastupny dzień bank paviedamiŭ, što hetaje padstava nie padychodzić i patrebnaja dziejučaja karta pobytu, viza, štamp u pašparcie abo daviedka ad vajavody.

Siarhiej sprabavaŭ rastłumačyć, što štampy ŭ pašparty ŭžo daŭno nie staviać, ale bank heta nie zadavoliła.

Paralelna biełarus źviarnuŭsia va Upraŭleńnie pa spravach zamiežnikaŭ, kab atrymać nieabchodnuju daviedku, ale tam jamu paviedamili, što čakać jaje daviadziecca dva miesiacy (a pavodle nieaficyjnaj infarmacyi ad inšych zamiežnikaŭ — navat da čatyroch miesiacaŭ, choć pavodle zakona takija daviedki pavinny vydavacca za 7 dzion).

Raptoŭnaja błakiroŭka

8 červienia bank dasłaŭ paŭtornaje patrabavańnie z pahrozaj «spynić praviadzieńnie lubych tranzakcyj pa rachunkach na padstavie artykuła 41, punkta 1, padpunkta 3 zakona ab AML».

U adkaz Siarhiej padaŭ aficyjnuju rekłamacyju z patrabavańniem pryznać štamp vajavodstva dastatkovym paćviardžeńniem zakonnaści znachodžańnia (na padstavie artykuła 108 zakona «Ab zamiežnikach»).

Zakonny termin jaje razhladu skončyŭsia 8 lipienia.

14 lipienia bank zabłakavaŭ tranzakcyi pa rachunkach Siarhieja, a ŭ mabilnym dadatku bałans staŭ adlustroŭvacca jak nulavy.

15 lipienia Siarhiej atrymaŭ papiarovy list — adkaz na rekłamacyju, u jakim bank paviedamiŭ, što štamp ad vajavody, pavodle ŭnutranych praviłaŭ banka, pryznajecca aktualnym tolki na praciahu adnaho miesiaca z daty vydačy.

Pakolki z momantu pastanoŭki štampa prajšło bolš za 7 miesiacaŭ, Pekao S.A. paličyŭ jaho niesapraŭdnym. Adpaviedna, bank admoviŭsia pryznać jaho naležnym dakumientam dla AML-pravierki.

U paviedamleńni pra błakiroŭku bank ukazaŭ, što daje klijentu termin da 8 žniŭnia, paśla čaho moža całkam spynić supracoŭnictva.

Siarhiej adznačaje, što situacyja z Pekao nie stała b dla jaho vialikaj prablemaj, kali b nie aformlenaja ipateka, bo bank dakładna nie tłumačyć, što aznačaje «spynieńnie supracoŭnictva» i jakija nastupstvy heta maje dla pazyčalnika.

Siarhiej baicca, što heta moža pryvieści da razryvu ipatečnaj damovy: «Ja miarkuju, što heta moža być razryŭ damovy pa majoj vinie i patrabavańnie vypłacić astatak ipateki. Pakolki hrošaj u mianie niama, to, nie viedaju, mahčyma, aryšt majomaści».

Pierafinansavać kredyt i pieranieści jaho ŭ inšy bank bieź dziejučaj karty pobytu taksama nie atrymajecca.

Što robić IT-śpiecyjalist

Heta nie pieršy kanflikt Siarhieja z bankam Pekao S.A. U minułym hodzie ŭ hety ž čas ad jaho patrabavali dazvoł na pracu, admaŭlajučysia prymać Blue Card i decyziju. Tady biełarusu ŭdałosia vyrašyć prablemu z dapamohaj rekłamacyi.

Ciapier Siarhiej zapatrabavaŭ ad banka rastłumačyć:

• ci zabłakavany jaho aščadny rachunak i na jakoj padstavie;
• što aznačaje «poŭnaje spynieńnie supracoŭnictva»;
• jakija nastupstvy heta budzie mieć.

Taksama jon nakiravaŭ zajavy finansavamu ambudsmienu (Rzecznik Finansowy) i ŭ Kamisiju finansavaha nahladu (KNF).

Akramia taho, biełarus źviarnuŭsia va Upraŭleńnie pa spravach zamiežnikaŭ z-za zatrymki vydačy daviedki. Kali situacyju nie atrymajecca vyrašyć praz ambudsmiena, Siarhiej hatovy źviartacca ŭ sud.

U jaho taksama jość rachunak u banku PKO BP, dzie, pavodle jaho słoŭ, takija žorstkija miery nie prymianiajucca:

«Tam mnie pišuć cikavyja paviedamleńni ŭ dadatku — maŭlaŭ, pryjdzicie ŭ adździaleńnie, daniasicie dakumienty. Ale rachunki nie błakujuć, pahroz błakiroŭki nie było. Abmiežavana tolki mahčymaść adkryvać novyja pradukty (naprykład, ja nie zmoh onłajn adkryć tam aščadny rachunak — sistema paprasiła pryjści ŭ adździaleńnie). Ja płanuju dajści tudy, jak tolki atrymaju daviedku ad vajavody».

Jeŭrakamisija raniej davała tłumačeńni: sankcyi nie pavinny zakranać rasijan i biełarusaŭ ź lehalnym statusam u Jeŭropie.

• 1
• 0
• 1
• 5
• 0
• 3
• 8
• 0