Parłamient Francyi pryniaŭ zakon ab eŭtanazii, niahledziačy na supraciŭ mnohich deputataŭ

Nacyjanalny schod Francyi paśla šmathadovych sprečak uchvaliŭ zakon ab dapamozie ŭ dobraachvotnym sychodzie z žyćcia. Pracedura atrymańnia takoj dapamohi ŭ zakonie praduhledžvaje vielmi strohija ŭmovy, piša Bi-bi-si.

Za novy zakon prahałasavaŭ 291 deputat nižniaj pałaty francuzskaha parłamienta, suprać — 241. Da hetaha zakon trojčy adchilaŭ Sienat — vierchniaja pałata parłamienta.

Premjer-ministr Siebaśćien Lekarniu nakiruje asobnyja artykuły zakona na razhlad Kanstytucyjnaha savieta Francyi, i tolki paśla jaho ŭchvaleńnia zakon ustupić u siłu.

Zakon daść prava prasić ab eŭtanazii paŭnaletnim hramadzianam Francyi, jakija pakutujuć ad ciažkich i nievylečnych zachvorvańniaŭ na apošnich stadyjach, kali hetyja chvaroby vyklikajuć pastajannyja i nievynosnyja fizičnyja abo psichałahičnyja pakuty. Taki pacyjent zmoža dobraachvotna vykazać svajo žadańnie zaviaršyć žyćcio, paviedamiŭšy pra heta ŭračam.

Paśla nieabchodnych kansultacyj miedyki pavinny buduć pryniać rašeńnie na praciahu 15 dzion.

Paśla hetaha pacyjentu budzie dadziena jašče dva dni na rozdum. 

Zatym jon pavinien budzie samastojna zrabić sabie śmiarotnuju injekcyju. Kali ž fizičny stan nie dazvalaje hetaha zrabić, injekcyju zrobić doktar abo miedycynskaja siastra.

Kančatkovaje rašeńnie pacyjenta ŭ dzień praviadzieńnia pracedury pavinien budzie zaśviedčyć jaho doktar.

U šerahu jeŭrapiejskich krain, u tym liku ŭ Ispanii, Niderłandach i Bielhii, eŭtanazija dla nievylečna chvorych užo lehalizavanaja.

U Hiermanii i Italii miedycynskaja dapamoha ŭ dobraachvotnym sychodzie z žyćcia dekryminalizavanaja, adnak jašče nie lehalizavanaja.

U Vialikabrytanii, jak i ŭ Francyi, dyskusii nakont dobraachvotnaha sychodu z žyćcia praciahvajucca ŭžo šmat hadoŭ. Čakajecca, što hetaj vosieńniu parłamient znoŭ razhledzić adpaviedny zakonaprajekt.

U Francyi suprać zakona vystupajuć, u pryvatnaści, Katalickaja carkva i častka miedycynskaj supolnaści. Nacyjanalny schod ciapier užo ŭ čaćviorty raz prahałasavaŭ za jaho, tady jak Sienat, dzie bolšaść naležyć pravym partyjam, trojčy adchilaŭ hety dakumient.

Razam z tym vyniki apytańniaŭ pakazvajuć, što ŭpeŭnienaja bolšaść francuzaŭ padtrymlivaje pradastaŭleńnie śmiarotna chvorym prava vybaru pamiž palijatyŭnaj dapamohaj i dobraachvotnym sychodam z žyćcia.

Napiaredadni hałasavańnia ŭ parłamiencie premjer-ministr Siebaśćien Lekarniu paviedamiŭ, što pieradaść asobnyja artykuły zakona na razhlad Kanstytucyjnaha savieta — orhana, jaki kantraluje adpaviednaść zakonaŭ Kanstytucyi Francuzskaj Respubliki.

Prezident Francyi Emaniuel Makron padtrymlivaje hety zakon, adnak premjer-ministr stavicca da takoj inicyjatyvy bolš aściarožna. Lekarniu maje namier paprasić Kanstytucyjny saviet acanić pieradusim try aśpiekty zakona:

• dastatkovaść dvuchdzionnaha terminu, adviedzienaha pacyjentu na rozdum i kančatkovaje paćviardžeńnie žadańnia pajści z žyćcia. Krytyki zakona ličać, što dvuch dzion niedastatkova;
• nakolki pacyjenty z parušeńniami zdolnaści da razvažańnia mohuć davać śviadomaje i abdumanaje zhodu na dobraachvotny sychod z žyćcia;
• ci budzie pravamiernym toje, što miedycynskija i inšyja ŭstanovy, hałoŭnaja meta dziejnaści jakich — akazańnie palijatyŭnaj dapamohi śmiarotna chvorym, zmohuć taksama dapamahać im dobraachvotna pajści z žyćcia.

• 4
• 0
• 0
• 0
• 0
• 0
• 0
• 0