Voś chto toj chłopiec, jaki pajechaŭ na prapołku bulby i staŭ hierojem sacsietak
Ścipły školnik nie čakaŭ, što stanie papularnym.
Na homielskim abłasnym telebačańni dniami vyjšaŭ siužet pra studencki atrad, jaki pracuje na prapołcy bulby na palach ekśpierymientalnaj bazy «Kryničnaja» ŭ Mazyrskim rajonie. Intervju adnaho ź junakoŭ zavirusiłasia ŭ sacsietkach.
«Pracuju ŭ studatradzie pieršy raz — usio vydatna. Na palach my tut źbirajem, pustazielle vyryvajem, jakaja trava inšaja. Bulbu nie čapajem. Chodzim pa palach. Va ŭsich jość svaja darožka.
Usio vydatna tut. Umovy ŭsie supier. Pracujem. Tak, ja kažu, tut va ŭsich pieršy raz amal. Usio vydali. Robu. Vada. Usio majecca. Kiepki, palčatki. Usio vydatna», — paśmiachajučysia apisaŭ chłopiec.
Hierojem akazaŭsia budučy 10-kłaśnik Vadzim Chodzik. Jon vučycca ŭ siaredniaj škole №16 Mazyra, piša BiełTA.
U žyćci Vadzim — ścipły chłopiec, sacyjalnyja sietki nie viadzie.
«Viadoma, nie dumaŭ, što stanu papularnym. Prosta niejak pracavaŭ na palach, pryjšli žurnalisty — i bam, užo papularnym pračynajusia», — ździŭleny jon.
Chłopiec reahuje na takuju słavu spakojna i abyjakava. «Šmat chto mnie heta dasyłaŭ užo: i siabry, i znajomyja. Usie spakojna reahujuć, ja spakojna reahuju, dy i ŭsio narmalna. Bačyŭ, što ŭ kamientaryjach šmat chto pisaŭ, ale mnie asabista nichto nie pisaŭ ź nieznajomych. Mnie niavažna, ci buduć razmovy pra heta ŭ škole. Pahladzim 1 vieraśnia».
Chłopiec zapisaŭsia ŭ studatrad i pieršapačatkova išoŭ na zbožžavyja pali. Ale trapiŭ na prapołku bulby. «Taksama nieskładanaja praca, narmalna».
Pracavać školniki pačynajuć a 9.30, źjazdžajuć a 13.00. «Pajšoŭ, kab prosta byli hrošy, padzarabić zachacieŭ dla siabie. Zvyčajna traču na adzieńnie i ježu», — raskazaŭ Vadzim Chodzik.
Školnik pierachodzić u 10‑y kłas, ale ŭžo vyznačyŭsia z budučynioj. Dobraje viedańnie hramadaznaŭstva i historyi padšturchnuła jaho hladzieć u bok jurydyčnych śpiecyjalnaściej i VNU ŭ Minsku. Ź dziacinstva Vadzim Chodzik taksama zachaplajecca hreka-rymskaj baraćboj, časta vystupaje na spabornictvach i navat vyjhravaŭ abłasnyja.
Kamientary