Navukoŭcy znajšli ŭ DR Konha novy vid małpaŭ. U ich ružova-aranžavyja vusny i čornaja morda

U lasach Demakratyčnaj Respubliki Konha žyvie małpa z ružova-aranžavymi vusnami, čornaj mordaj i čornaj poŭściu. Prymata zaŭvažyli i sfatahrafavali ŭ kronach dreŭ hustych trapičnych lasoŭ u nacyjanalnym parku Łamami ŭ centralna-ŭschodniaj častcy krainy, piša Bi-bi-si.

Upieršyniu pra niezvyčajnuju žyviołu stała viadoma jašče ŭ 2008 hodzie, kali jaje zaŭvažyli śpiecyjalisty pa achovie pryrody. Adnak tady im udałosia zrabić tolki adnu razmytuju fatahrafiju.

Praź dziesiać hadoŭ małpu ŭbačyli znoŭ, paśla čaho na jaje pošuki adpraviłasia mižnarodnaja hrupa daśledčykaŭ. U vyniku navukoŭcy ŭstanavili, što heta raniej nie viadomy navucy vid.

Za apošnija 75 hadoŭ heta tolki piaty novy vid afrykanskich małpaŭ.

Viadučuju rolu ŭ daśledavańni adyhraŭ Džunijor Amboka, aśpirant Fłarydskaha Atłantyčnaha ŭniviersiteta. Praca ŭklučała aŭdyjazapisy, fotazdymku i padrabiaznyja hienietyčnyja daśledavańni.

Vyniki apublikavanyja ŭ časopisie PLoS One. Niekatoryja miascovyja žychary ŭžo viedali pra isnavańnie hetaj małpy i nazyvajuć jaje «likvieli». Adnak «adkryćcio» vidu ŭ dadzienym vypadku aznačaje jaho aficyjnuju rehistracyju i paćviardžeńnie taho, što jon evalucyjanavaŭ i staŭ hienietyčna adasoblenym.

Amboka adznačaje, što hetyja małpy «ŭ peŭnaj stupieni saramlivyja» i addajuć pieravahu chavacca ŭ drevach.

— U ramkach našaha daśledavańnia my apytali žycharoŭ 52 viosak, raźmieščanych pablizu miescaŭ pražyvańnia hetych žyvioł. I tolki žychary vaśmi viosak kali-niebudź ich bačyli, — uspaminaje jon.

Daśledčaja hrupa, u skład jakoj uvajšli navukoŭcy z DR Konha, ZŠA i Hiermanii, dała novamu vidu łacinskuju nazvu Colobus congoensis — u znak pryznańnia bahataj pryrodnaj raznastajnaści krainy. Colobus congoensis naležyć da rodu kałobusaŭ.

— Heta sapraŭdy vielmi važnyja pradstaŭniki afrykanskich małpaŭ, jakija nie majuć vialikich palcaŭ, — tłumačyć prafiesar Kiejt Detvajler z Fłarydskaha Atłantyčnaha ŭniviersiteta.

Pavodle jaje słoŭ, heta travajednyja žyvioły, jakija žyvuć u kronach dreŭ i źjaŭlajucca važnaj častkaj ekasistemy.

— My ličym, što jany adyhryvajuć istotnuju rolu ŭ raspaŭsiudžvańni nasieńnia i jaho prarastańni ŭ lesie, — adznačaje daśledčyca.

Pavialičyć

Prafiesar Detvajler miarkuje, što niezvyčajnyja jarkija adznaki na mordzie małpaŭ mohuć słužyć vizualnym sihnałam dla inšych žyvioł — pryciahvać patencyjnych partnioraŭ abo dapamahać asobinam paznavać adna adnu.

Colobus congoensis vydajuć charakterny «ryklivy» kryk.

— Ich časta čuvać, ale nie vidać, — kaža Amboka.

Navukoŭcy ličać, što heta redkija žyvioły, jakich možna sustreć tolki ŭ toj častcy lesu, dzie jość nieabchodnyja dla ich korm i asiarodździe pražyvańnia.

Na hetych małpaŭ palujuć dziela miasa, tamu daśledčyki spadziajucca, što ciapier, kali Colobus congoensis aficyjna pryznany asobnym vidam, jaho ŭdasca ŭziać pad dziaržaŭnuju achovu.

Niadaŭna adkryty vid pa-raniejšamu vyklikaje šmat pytańniaŭ, tamu navukoŭcy płanujuć pravieści bolš detalovyja daśledavańni, kab acanić kolkaść papulacyi i vyvučyć pavodziny hetych małpaŭ.

• 2
• 0
• 0
• 0
• 0
• 0
• 0
• 0