Padraździaleńnie śpiecyjalnaha pryznačeńnia Nacyjanalnaj hvardyi Ukrainy praviało apieracyju ŭ akupavanym Krymie, u vyniku jakoj byŭ źniščany rasijski frantavy bambardziroŭščyk Su-24M na vajskovym aeradromie «Saki». Pra heta paviedamiŭ kamandujučy Nacyjanalnaj hvardyjaj Ukrainy Alaksandr Piŭnienka.
Pa słovach Alaksandra Piŭnienki, apieracyju vykanali bajavyja vadałazy Centra śpiecyjalnaha pryznačeńnia «Amieha». Pierad udaram była praviedziena raźviedka i praciahłaje nazirańnie za cellu. Ataku arhanizavali ŭ momant, kali samalot rychtavali da čarhovaha bajavoha vyletu dla naniasieńnia ŭdaraŭ pa terytoryi Ukrainy.
Pavodle infarmacyi Piŭnienki, dla źniščeńnia samalota byli vykarystanyja dva bieśpiłotniki. Pieršy trapiŭ u nasavuju častku Su-24M, a druhi ŭdaryŭ u rajon paliŭnych bakaŭ. U vyniku samalot byŭ całkam źniščany.
Kamandujučy Nachvardyjaj adznačyŭ, što hetaja apieracyja śviedčyć pra zdolnaść ukrainskich śpiecpadraździaleńniaŭ nanosić vysokadakładnyja ŭdary pa važnych vajskovych abjektach praciŭnika daloka ŭ jaho tyle. Jon taksama padkreśliŭ, što Nacyjanalnaja hvardyja praciahvaje raźvivać mahčymaści vykarystańnia ŭdarnych bieśpiłotnych sistem na značnaj apieratyŭnaj hłybini.
Su-24M — heta frantavy bambardziroŭščyk, jaki rasijskija vojski aktyŭna vykarystoŭvajuć dla naniasieńnia rakietna-bombavych udaraŭ pa terytoryi Ukrainy.
Kamientary
Dziakuj ZSU!