Michaił Fiodaraŭ paćvierdziŭ, što pryčyna jaho adstaŭki — kanflikt z hałoŭnakamandujučym USU Syrskim

Pa słovach Michaiła Fiodarava, Ukrainie patrebnyja «kardynalnyja kadravyja rašeńni», bo bieź ich niemahčyma pieramahčy praciŭnika ź mienšymi stratami.

Fiodaraŭ taksama paćvierdziŭ najaŭnaść kanfliktu z Alaksandram Syrskim. Jon zajaviŭ, što hałoŭnakamandujučy nibyta błakavaŭ jahonyja inicyjatyvy i nie chacieŭ abmiarkoŭvać prablemnyja pytańni, a zamiest hetaha nibyta zajmaŭsia ŭnutranymi intryhami.

Pry hetym Fiodaraŭ adznačyŭ, što rašeńnie nie zvalniać Syrskaha naležyć prezidentu Ukrainy jak viarchoŭnamu hałoŭnakamandujučamu. Jon zajaviŭ, što prymaje hetaje rašeńnie i budzie vučycca pracavać u najaŭnych umovach, adnak padkreśliŭ, što jaho kamanda sutyknułasia z poŭnym błakavańniem prapanavanych reformaŭ.

«Kali prezident skazaŭ, što nie płanuje źmianiać Syrskaha, ja z hetym rašeńniem całkam pahadziŭsia i skazaŭ, što značyć ja budu vučycca pracavać ź im. Bo naš klijent — uvieś ukrainski narod.

Ale my sutyknulisia z tym, što ŭsie inicyjatyvy, jakija my prapanoŭvali, pačali błakavacca. I Syrski nie hatovy asabista ŭ vočy havaryć pra prablemy. Jon hatovy chadzić asabista na sustrečy, pleści intryhi, dumać, što chtości zakazaŭ u miedyjach niejkuju kampaniju, a nie prablema ŭ dziejańniach, jakija adbyvajucca. Heta pryviało da taho, što pa fakcie jon pastaviŭ ultymatum.

Zamiest taho, kab prydumać jak asimietryčna pieramahčy Rasiju, jon prydumaŭ, jak raskałoć krainu. I ŭ hetym jość vialikaja prablema…

Ja nie staviŭ umoŭ, «abo ja, abo Syrski». Ja skazaŭ, što značyć budziem pieramahać Rasiju z takim hałaŭkamam».

Razam z tym Fiodaraŭ padkreśliŭ, što nie varta niedaaceńvać Syrskaha jak vajskovaha kamandujučaha. Jon nahadaŭ, što ŭ 2022 hodzie Syrski adyhraŭ značnuju rolu ŭ abaronie Ukrainy, u tym liku ŭ bajach za Kijeŭ i Charkaŭ, a taksama padčas vyzvaleńnia Chiersona. Adnak, pavodle Fiodarava, paśla hetaha charaktar vajny istotna źmianiŭsia i patrabuje inšych padychodaŭ.

«Ale vajna całkam źmianiłasia, całkam. Drony źmianiajucca pa 4 razy na hod. Sistema kiravańnia źmianiłasia, i my pavinny mianiacca. My nie možam jechać na tym, što było tady. Treba razumieć, što treba było rabić tady i što treba zaraz, kab pieramahać Rasiju.

Ja nie dumaju, što heta prablema eha. Ja dumaju, što jość inšyja niejkija pryčyny… Nie padpisana šmat dakumientaŭ. Ja adkryta kazaŭ pra heta: biurakratyčna my ŭmiejem hulać, davajcie heta zrobim. Mnie skazali: «Nie čapaj!», i ja ciarpieŭ i byŭ hatovy spakojna pracavać, pakul hałaŭkam nie pastaviŭ ultymatum».

Raniej ukrainskija i zamiežnyja srodki masavaj infarmacyi ŭžo paviedamlali pra napružanaść pamiž Fiodaravym i Syrskim. A paśla paviedamleńniaŭ pra adstaŭku Fiodarava ŭ niekalkich ukrainskich haradach prajšli akcyi ŭ jaho padtrymku.

• 4
• 1
• 1
• 8
• 0
• 3
• 2
• 0