U Tehieranie prachodzić raźvitańnie z Ali Chamieniei: Miadźviedzieŭ pahražaje błakadaj pralivaŭ, a novy lidar Irana chavajecca ŭ bunkiery

Pavodle paviedamleńniaŭ iranskaha ahienctva IRNA, cyrymonija raźvitańnia z Ali Chamieniei i členami jaho siamji, jakija zahinuli ŭ vyniku ŭdaru ZŠA i Izraila, pačałasia ranicaj 4 lipienia ŭ tehieranskaj miačeci Masała imia imama Chamiejni.

Były kiraŭnik Irana byŭ zabity ŭ lutym 2026 hoda padčas maštabnaj ataki, a aficyjny džanaza-namaz (pachavalnaja malitva) pryznačany na ranicu 5 lipienia. Siońniašniaja akcyja ŭžo sabrała dziasiatki tysiač čałaviek. Iranskija śpiecsłužby napiaredadni cyrymonii vypuścili aficyjnuju zajavu, u jakoj paabiacali nieadkładna adpomścić za zabojstva kiraŭnictva.

Pavialičyć

Dla ŭdziełu ŭ žałobnych mierapryjemstvach u Tehieran prybyli zamiežnyja pradstaŭniki. Biełaruskuju delehacyju ŭznačaliŭ staršynia Pałaty pradstaŭnikoŭ Ihar Sierhiejenka, jaki płanuje pravieści šerah sustreč z kiraŭnictvam krainy dla abmierkavańnia sumiesnych ekanamičnych prajektaŭ.

Rasiju pradstaŭlaje namieśnik staršyni Savieta biaśpieki RF Dźmitryj Miadźviedzieŭ. Padčas jaho sustrečy z prezidentam Irana Masudam Piezieškijanam baki abmierkavali pašyreńnie stratehičnaha supracoŭnictva.

Paśla pieramoŭ Miadźviedzieŭ zajaviŭ žurnalistam, što Iran vałodaje ŭłasnaj «zbrojaj, nie słabiejšaj za termajadziernuju» — Armuzskim i Bab-el-Mandebskim pralivami. Pavodle jaho słoŭ, pierakryćcio hetych arteryj zdolnaje całkam spynić suśvietnyja transpartnyja i naftavyja pieravozki.

Pavialičyć

Pavialičyć

Hałoŭnaj intryhaj unutrypalityčnaha žyćcia Irana zastajecca los novaha viarchoŭnaha lidara Madžtaby Chamieniei.

Pavodle źviestak The New York Times, z momantu svajho pryznačeńnia ŭ sakaviku jon ni razu nie źjaŭlaŭsia na publicy i kiruje krainaj ź izalavanaha bunkiera. Jaho biaśpieka źjaŭlajecca absalutnym pryjarytetam dla iranskich śpiecsłužbaŭ z-za pahrozy likvidacyi z boku Izraila i ZŠA.

Chamieniei-małodšy nie prysutničaŭ navat na pachavańni ŭłasnaj žonki Zachry Chadad-Adel, jakoje adbyłosia napiaredadni. Paviedamlajecca, što słužby biaśpieki adchilili jaho prośbu pryniać udzieł u asnoŭnych mierapryjemstvach, adnak jon płanuje pračytać malitvu za baćku 9 lipienia ŭ Miešchiedzie. Praciahłaja izalacyja vyklikaje ŭ iranskim hramadstvie čutki pra jaho fizičnuju słabaść abo mahčymuju hibiel.

Pavialičyć

Vydańni The New York Times i The Washington Post paviedamlajuć pra hłyboki raskoł u iranskim kiraŭnictvie. Novaje kiraŭnictva krainy stała bolš žorstkim: klučavyja pazicyi zaniali vychadcy z Korpusa vartavych isłamskaj revalucyi (KVIR).

U pryvatnaści, pasadu sakratara Vyšejšaha savieta nacyjanalnaj biaśpieki zaniaŭ Machamad Bahier Zalhadr, a novym hałoŭnakamandujučym KVIR staŭ Achmad Vachidzi.

Adnak hrupa «prahmatykaŭ», da jakoj adnosiać prezidenta Masuda Piezieškijana i śpikiera parłamienta Machamada-Bahiera Halibafa, praciahvaje zmahacca za ŭpłyŭ i vystupaje za spynieńnie bajavych dziejańniaŭ. Pavodle infarmacyi krynic NYT, mienavita hetaja hrupa pracisnuła rašeńnie ab pramych pieramovach ź vice-prezidentam ZŠA Džej Dzi Vensam i padpisańni pahadnieńnia z administracyjaj Donalda Trampa.

Na finalnym etapie pieramovaŭ prezident Piezieškijan pastaviŭ ultymatum novamu viarchoŭnamu lidaru, pryhraziŭšy adstaŭkaj, kali mirnaje pahadnieńnie nie budzie ŭchvalena, pakolki amierykanskaja vajskova-marskaja błakada całkam paralizuje ekanomiku Irana. Hetamu kursu praciahvaje žorstka supraćstajać kansiervatyŭnaje kryło, jakoje ličyć lubyja sastupki Vašynhtonu niedapuščalnymi i vinavacić urad u padrychtoŭcy dziaržaŭnaha pieravarotu.

• 0
• 0
• 4
• 4
• 0
• 0
• 0
• 0