У Еўрапейскім гуманітарным універсітэце (ЕГУ) зацверджаныя новыя ўмовы аказання фінансавай дапамогі студэнтам з Беларусі.
З наступнага навучальнага года (2016/2017) кошт аплаты навучання будзе прывязаны не да памеру групы, а да агульнаўніверсітэцкага рэйтынгу абітурыента на момант паступлення.
На бакалаўрскіх праграмах вочнай формы навучання з'явяцца бясплатныя месцы для абітурыентаў з Беларусі з рэйтынгам 9,41 бала і вышэй. Як растлумачылі БелаПАН у прэс-службе ЕГУ, колькасць бясплатных месцаў не будзе прывязаная да пэўнай колькасці студэнтаў-беларусаў у той ці іншай групе, як гэта было раней. «Замест гэтага фінансавая падтрымка будзе наўпрост залежаць ад рэйтынгу абітурыента пры паступленні ва ўніверсітэт і на працягу яго/яе вучобы. Гэта значыць, што мы дапускаем магчымасць таго, што цэлая група студэнтаў-беларусаў будзе вучыцца бясплатна, калі, скажам, пры паступленні на праграму «Сусветная палітыка і эканоміка» іх рэйтынг будзе складаць 9,41 і вышэй», — адзначылі ў прэс-службе.
Акрамя таго, бясплатныя месцы для навучання на вочнай форме ўводзяцца таксама па праграмах «Візуальны дызайн і медыя» і «Міжнароднае права і права Еўрапейскага саюза», дзе іх раней не было.
Максімальны гадавы кошт навучання для беларусаў з наступнага года складзе 2.000 еўра замест ранейшых 2.500 еўра і будзе ўжывацца да абітурыентаў з рэйтынгам ад 8,60 бала і ніжэй.
Пры паступленні на кірунак «Медыя і камунікацыя» на бясплатнае навучанне могуць разлічваць абітурыенты з рэйтынгам 9,81 і вышэй, а максімальны кошт навучання заплацяць абітурыенты з рэйтынгам 9,0 і ніжэй. Кошт навучання для абітурыентаў з рэйтынгам ад 9,01 да 9,40 складзе 800 еўра ў год, ад 8,61 да 9,0 — 1.400 еўра, для грамадзян іншых краін — 2.500 еўра.
Рэктар ЕГУ прафесар Дэвід Полік лічыць, што новы падыход у аказанні студэнтам з Беларусі фінансавай дапамогі «дапаможа прыцягнуць яшчэ больш шырокае кола абітурыентаў, забяспечыць празрыстасць пры размеркаванні грантаў паміж студэнтамі і ўмацуе палітыку фінансавай падтрымкі студэнтаў універсітэтам», адзначылі ў прэс-службе.
Рэйтынг абітурыентаў вочнага бакалаўрыяту ў ЕГУ разлічваецца на аснове сярэдняга арыфметычнага ад сярэдняга бала атэстата па гуманітарных прадметах, адзнакі па экзамене па замежнай мове, адзнакі па экзамене па эсэ ці кампазіцыі і адзнака па профільным прадмеце. Пры паступленні на праграму «Медыя і камунікацыя» абітурыенты таксама падаюць партфоліа, якое ацэньваецца дадатковымі баламі ад 0,1 да 1,0.
На аснове рэйтынгу пры паступленні абітурыенту ўстанаўліваецца тарыф на навучанне, які сапраўдны на працягу першага семестра. Па выніках сесіі фінансавая падтрымка пераразмяркоўваецца ў залежнасці ад акадэмічных дасягненняў студэнтаў, далей рэйтынг пералічваецца па выніках кожнага года навучання.
У 2015/16 навучальным годзе сярэдні памер фінансавай дапамогі, які аказваецца кожнаму беларускаму студэнту ЕГУ, складае 658 еўра. Фінансавую падтрымку аказваюць Еўрапейская камісія, Савет міністраў Паўночных краін, а таксама ўрады краін Заходняй Еўропы і ЗША. Студэнты таксама могуць прэтэндаваць на імянныя і іншыя стыпендыі, якія выдаюцца за высокую акадэмічную паспяховасць, актыўную навуковую і творчую дзейнасць.
У межах прыёмнай кампаніі 2016 года ЕГУ будзе ажыццяўляць прыём абітурыентаў на пяць бакалаўрскіх, шэсць магістарскіх і адну доктарскую праграму.
Каментары