Apieratar śpisaŭ hrošy za roŭminh, choć abanient byŭ u Biełarusi. Jak tak?

Biełarus raskazaŭ u Threads, što kala litoŭskaj miažy, znachodziačysia na terytoryi Biełarusi, telefon jaho žonki padklučyŭsia da roŭminhu, z-za čaho z rachunku byli śpisanyja hrošy.

Mužčyna aburyŭsia situacyjaj, a adkaz słužby padtrymki jaho nie zadavoliŭ. Pavodle jaho słoŭ, apieratar nie viarnuŭ stračanyja srodki. Onliner.by vyśvietliŭ padrabiaznaści i atrymaŭ kamientaryj apieratara.

Jak raskazaŭ Dźmitryj, aŭtar dopisu, jon razam z žonkaj i bratam viartaŭsia dadomu ŭ Homiel na aŭtamabili paśla fiestyvalu Viva Braslav. Ich maršrut prachodziŭ praz ahraharadok Kaziany, jaki znachodzicca niedaloka ad miažy ź Litvoj.

«Na telefony majoj žonki i brata pryjšli SMS pra toje, što ŭ ich padklučany roŭminh i buduć śpisvacca srodki pavodle taryfu. U vyniku A1 śpisaŭ z rachunku žonki 12 rubloŭ. Brat taksama atrymaŭ papiaredžańnie pra ŭklučany roŭminh, ale ŭ jaho mabilny internet byŭ adklučany, tamu ničoha nie śpisałasia.

Razumieju, što adkaznaść za ŭklučany roŭminh całkam lažyć na nas, ale apieratar nijak nie papiaredziŭ, što my znachodzimsia ŭ pamiežnaj zonie i mahčymyja śpisańni», — raskazaŭ mužčyna žurnalistu Onlíner.

Pavialičyć

Pavodle słoŭ Dźmitryja, u słužbie padtrymki jamu rastłumačyli, što litoŭskija bazavyja stancyi «pracujuć macniej za biełaruskija, tamu vašy pryłady padklučylisia da ich sietki, i z vas byli śpisanyja srodki za roŭminh».

«Dadam ad siabie: liču hetuju situacyju niespraviadlivaj tolki tamu, što ad A1 nie było nijakaha papiaredžańnia — adrazu adbyłosia śpisańnie hrošaj. Taksama kryŭdna, što my nie pakidali Biełaruś, ale zapłacili za vykarystańnie sietki inšaj krainy, choć nam heta było nie patrebna. Apieratar ničoha nie viarnuŭ», — aburajecca biełarus.

Kampanija A1 u mai pradstaviła novuju sistemu taryfikacyi mabilnaha internetu za miažoj pad nazvaj «AntyRoŭminh». Siarod inšaha abiacalisia «tolki prazrystyja ŭmovy» i «nijakich niečakanych vydatkaŭ».

Što adkazaŭ apieratar

Pradstaŭniki A1 prakamientavali situacyju i rastłumačyli, jak paźbiehnuć padobnych vypadkaŭ:

«U pamiežnaj zonie mabilnyja pryłady abanientaŭ mohuć prymać sihnał ad bazavych stancyj zamiežnych apierataraŭ. Vybar, padklučacca da ich ci nie, zaležyć ad unutranaj łohiki smartfona, jaki ŭ režymie realnaha času pastajanna skanuje sietki i moža padklučacca da roznych bazavych stancyj u zaležnaści ad ich blizkaści, mahutnaści i typu sihnału, nahruzki na sietku i inšych techničnych faktaraŭ.

Paŭpłyvać na hety pryncyp pracy mabilnych pryład apieratary suviazi nie mohuć. Pa hetaj ža pryčynie apieratary nie mohuć vyznačyć, ź jakoha boku miažy znachodzicca abanient, i nie majuć mahčymaści paŭpłyvać na jaho rehistracyju ŭ toj ci inšaj sietcy.

Kab paźbiehnuć padobnych vypadkaŭ, rekamiendujem uklučać pasłuhi roŭminhu tolki padčas pajezdak za miažu abo ŭstalavać ručny vybar sietki i zarehistravacca ŭ sietcy A1 Biełaruś, kab pryłada nie sprabavała padklučacca da sietki zamiežnaha apieratara».

• 1
• 1
• 1
• 1
• 0
• 0
• 1
• 0