Lidary krain G7 damovilisia ŭzmacnić cisk na Rasiju praz naftu i haz. Zdajecca, nichto nie suprać
Na samicie krain «Vialikaj siamiorki» (G7) lidary dziaržavaŭ abmierkavali dalejšyja dziejańni ŭ adnosinach da Rasii i padtrymku Ukrainy. Kali mierkavać sa słoŭ udzielnikaŭ sustrečy, krainy G7 pryjšli da ahulnaj pazicyi, što nieabchodna ŭzmacniać cisk na Rasiju i praciahvać dapamohu Ukrainie, piša The Moscow Times.
Adnym z hałoŭnych instrumientaŭ takoha cisku pavinny stać novyja abmiežavańni suprać rasijskaha ekspartu nafty i hazu. Pavodle krynic u francuzskich dypłamatyčnych kołach, zhoda pa hetym pytańni była dasiahnutaja paśla pieramoŭ, u jakich udzielničaŭ prezident Ukrainy Uładzimir Zialenski. U toj ža čas Vialikabrytanija i Kanada ŭžo abviaścili pra ŭviadzieńnie novych sankcyj.
Pavodle francuzskaha boku, uzmacnieńniu sankcyj spryjaje źnižeńnie suśvietnych cen na naftu i haz paśla dasiahnieńnia mirnaj damoŭlenaści pamiž ZŠA i Iranam. Heta dazvalaje zachodnim krainam bolš žorstka abmiažoŭvać rasijskija enierhietyčnyja dachody, nie vyklikajučy značnaha rostu cenaŭ na rynkach.
Akramia ekanamičnaha cisku, abmiarkoŭvałasia i dadatkovaja vajskovaja padtrymka Ukrainy, u pieršuju čarhu ŭzmacnieńnie sistem supraćpavietranaj abarony. Zialenski źviarnuŭsia da ZŠA z prośbaj dać dazvoł na vytvorčaść va Ukrainie rakiet-pierachopnikaŭ dla kompleksaŭ Patriot, pakolki kraina zastajecca ŭraźlivaj pierad rasijskimi balistyčnymi rakietami. Padčas sustrečy jon taksama prademanstravaŭ Donaldu Trampu kadry nastupstvaŭ rasijskaha ŭdaru pa Kijeva-Piačerskaj łaŭry.
Sustreča Zialenskaha z Trampam prajšła ŭ pazityŭnaj atmaśfiery. Pavodle słoŭ Trampa, razmova była «vielmi dobraj», a taksama płanavalisia dalejšyja pieramovy. Pierad hetym Zialenski abmiarkoŭvaŭ z prezidentam Francyi Emanuelem Makronam, jak lepš pabudavać dyjałoh z amierykanskim lidaram.
Ukrainski prezident zajaviŭ, što, na jaho dumku, Uładzimir Pucin nie maje namieru dobraachvotna spyniać vajnu, tamu Rasiju nieabchodna prymusić da hetaha najpierš praz bolš žorstkija sankcyi. Pavodle jaho słoŭ, takuju pazicyju padtrymali ŭsie krainy G7.
Taksama abmiarkoŭvałasia mahčymaść adnaŭleńnia bolš žorstkich amierykanskich sankcyj suprać rasijskaj nafty. Raniej ZŠA niekalki razoŭ adkładali ich poŭnaje ŭviadzieńnie, ale čarhovy termin adterminoŭki zakančvajecca 17 červienia, i Donald Tramp zajaviŭ, što Vašynhton moža bolš jaho nie praciahvać.
Na fonie hetych padziej źmianiłasia i ahulnaja acenka situacyi na froncie. Pavodle pradstaŭnikoŭ krain G7, Jeŭropa i ZŠA ŭsio bolš schilajucca da mierkavańnia, što pazicyi Ukrainy ŭzmacniajucca, a Rasija nie zdolnaja damahčysia pieramohi ŭ vajnie. Naziralniki adznačajuć, što heta adroźnivajecca ad bolš aściarožnych acenak Donalda Trampa paśla jaho sustrečy z Uładzimiram Pucinym u Ankorydžy ŭ žniŭni 2025 hoda.
Ciapier čytajuć
U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami15
Kamientary