Rasija raspracavała sistemu REB koštam $1,5 miljona, zdolnuju hłušyć sihnał Starlink na płoščy 20 kvadratnych kiłamietraŭ
Rasijskija vajskoŭcy pačali prymianiać novuju sistemu radyjoelektronnaj baraćby «Vołna Kupoł Harant», zdolnuju padaŭlać sihnał spadarožnikavaj suviazi Starlink na płoščy da 20 kvadratnych kiłamietraŭ. Pra heta paviedamiŭ daradca ministra abarony Ukrainy, śpiecyjalist u halinie vajskovych radyjotechnałohij Siarhiej Biaskrestnaŭ (pazyŭny «Fłeš»), piša The Moscow Times.
Pavodle danych Siarhieja Biaskrestnava, kompleks vyrablaje simfieropalskaje pradpryjemstva TAA «Rasijski kupał», jon pastaŭlajecca armii pa canie kala 1,5 miljona dalaraŭ za adzinku.
Pryncyp pracy sistemy, pavodle słoŭ Fłeša, davoli prosty: na ziamli raźmiaščajucca spadarožnikavyja anteny, nakiravanyja na spadarožnik Starlink, jaki pralataje mima. Sistema vypramieńvaje mahutnyja pieraškody ŭ dyjapazonie 14—14,5 HHc.
«Hety dyjapazon padzieleny na 8 kanałaŭ šyrynioj 62,5 MHc kožny. Rasijanie ŭmoŭna ŭziali 8 spadarožnikavych talerak, nakiravali ich na spadarožnik, i kožnaja talerka pieradaje pieraškody na svaim kanale. Usio. Spadarožnik «ahłuch», — patłumačyŭ ekśpiert.
Pieršaje prymianieńnie takoj sistemy, pavodle danych «Fłeša», było zafiksavana jašče ŭ 2024 hodzie na charkaŭskim kirunku, ale tady kompleks chutka vyjavili i źniščyli. Da 2026 hoda masavych sprob paŭtornaha vykarystańnia nie fiksavałasia. Adnak paśla pačatku atak Ukrainy na rasijskuju łahistyku vypadki padaŭleńnia Starlink pačaścilisia.
Niadaŭna kamandzir 422‑ha asobnaha padraździaleńnia Bieśpiłotnych sił apublikavaŭ videa źniščeńnia adnaho takoha kompleksu, paćvierdziŭšy, što ŭkrainskija siły sistematyčna vyjaŭlajuć i likvidujuć padobnyja srodki REB.
Naprykancy maja staršynia rasijskaj Dziarždumy Viačasłaŭ Vałodzin zajaviŭ, što vykarystańnie spadarožnikavych technałohij Ukrainaj moža vymusić Rasiju prymianić zbroju, «jakaja nie pakinie śledu ni ad kaho». Pry hetym raniej rasijskaja armija sama aktyŭna vykarystoŭvała terminały Starlink dla kaardynacyi vojskaŭ, ale paśla taho jak SpaceX pa patrabavańni Kijeva adklučyła ŭsie niezarehistravanyja va Ukrainie aparaty, prasoŭvańnie rasijskich vojskaŭ rezka zapavoliłasia.
10 červienia Dziaržduma pryniała pakiet papravak, jakija zabaraniajuć prodaž u Rasii abstalavańnia dla zamiežnych sistem spadarožnikavaj suviazi, što nie atrymali dazvołu na vykarystańnie rasijskich radyjočastot — u pieršuju čarhu havorka idzie pra terminały Starlink. U rasijskim Ministerstvie ličbavaha raźvićcia, suviazi i masavych kamunikacyj paćvierdzili, što novyja miery zamacoŭvajuć zabaronu na prodaž abstalavańnia, jakoje pracuje ŭ abychod dziaržrehulavańnia. Paralelna ŭ Rasii sprabujuć stvaryć ułasnyja spadarožnikavyja sistemy suviazi, u pryvatnaści prajekt «Rasśviet» kampanii «Biuro 1440», jaki nazyvajuć rasijskim anałaham Starlink.
Rasijski anałah Starlink straciŭ adzin sa svaich spadarožnikaŭ
U Biełarusi zapuściać rasijskuju sistemu, jakaja prezientujecca jak anałah Starlink
Ukraina adkryła darohu svaim dronam dla ŭdaraŭ pa Rasii, źniščyŭšy pryfrantavuju SPA
Udaraŭ USU pa abjektach u hłybini Rasii i pryfrantavoj zonie stała bolš. Jak Ukraina vyrvałasia napierad u technałahičnaj honcy?
Adklučeńnie «Starlinkaŭ»: jak heta paŭpłyvała na ŭkrainskuju i rasijskuju armii
Ciapier čytajuć
Adpačynak dla biasstrašnych i biespryncypovych: što ciapier z turami ź Biełarusi ŭ Krym?9
Kamientary
Hłušiť sputniki po aplinku - eto, kstati, daleko nie novaja tiechnołohija. Tolko nizkoorbitalnyje rańšie nie hłušili.