Лідары краін G7 дамовіліся ўзмацніць ціск на Расію праз нафту і газ. Здаецца, ніхто не супраць
На саміце краін «Вялікай сямёркі» (G7) лідары дзяржаваў абмеркавалі далейшыя дзеянні ў адносінах да Расіі і падтрымку Украіны. Калі меркаваць са слоў удзельнікаў сустрэчы, краіны G7 прыйшлі да агульнай пазіцыі, што неабходна ўзмацняць ціск на Расію і працягваць дапамогу Украіне, піша The Moscow Times.
Адным з галоўных інструментаў такога ціску павінны стаць новыя абмежаванні супраць расійскага экспарту нафты і газу. Паводле крыніц у французскіх дыпламатычных колах, згода па гэтым пытанні была дасягнутая пасля перамоў, у якіх удзельнічаў прэзідэнт Украіны Уладзімір Зяленскі. У той жа час Вялікабрытанія і Канада ўжо абвясцілі пра ўвядзенне новых санкцый.
Паводле французскага боку, узмацненню санкцый спрыяе зніжэнне сусветных цэн на нафту і газ пасля дасягнення мірнай дамоўленасці паміж ЗША і Іранам. Гэта дазваляе заходнім краінам больш жорстка абмяжоўваць расійскія энергетычныя даходы, не выклікаючы значнага росту цэнаў на рынках.
Акрамя эканамічнага ціску, абмяркоўвалася і дадатковая вайсковая падтрымка Украіны, у першую чаргу ўзмацненне сістэм супрацьпаветранай абароны. Зяленскі звярнуўся да ЗША з просьбай даць дазвол на вытворчасць ва Украіне ракет-перахопнікаў для комплексаў Patriot, паколькі краіна застаецца ўразлівай перад расійскімі балістычнымі ракетамі. Падчас сустрэчы ён таксама прадэманстраваў Дональду Трампу кадры наступстваў расійскага ўдару па Кіева-Пячэрскай лаўры.
Сустрэча Зяленскага з Трампам прайшла ў пазітыўнай атмасферы. Паводле слоў Трампа, размова была «вельмі добрай», а таксама планаваліся далейшыя перамовы. Перад гэтым Зяленскі абмяркоўваў з прэзідэнтам Францыі Эмануэлем Макронам, як лепш пабудаваць дыялог з амерыканскім лідарам.
Украінскі прэзідэнт заявіў, што, на яго думку, Уладзімір Пуцін не мае намеру добраахвотна спыняць вайну, таму Расію неабходна прымусіць да гэтага найперш праз больш жорсткія санкцыі. Паводле яго слоў, такую пазіцыю падтрымалі ўсе краіны G7.
Таксама абмяркоўвалася магчымасць аднаўлення больш жорсткіх амерыканскіх санкцый супраць расійскай нафты. Раней ЗША некалькі разоў адкладалі іх поўнае ўвядзенне, але чарговы тэрмін адтэрміноўкі заканчваецца 17 чэрвеня, і Дональд Трамп заявіў, што Вашынгтон можа больш яго не працягваць.
На фоне гэтых падзей змянілася і агульная ацэнка сітуацыі на фронце. Паводле прадстаўнікоў краін G7, Еўропа і ЗША ўсё больш схіляюцца да меркавання, што пазіцыі Украіны ўзмацняюцца, а Расія не здольная дамагчыся перамогі ў вайне. Назіральнікі адзначаюць, што гэта адрозніваецца ад больш асцярожных ацэнак Дональда Трампа пасля яго сустрэчы з Уладзімірам Пуціным у Анкорыджы ў жніўні 2025 года.
Цяпер чытаюць
У гадавіну смерці Жанны Фрыске Дзмітрый Шэпелеў распавёў, чаму не дазваляе сыну бачыцца з яе сваякамі15
Каментары