«Lepš 28‑m členam ES, čym 51‑m štatam ZŠA». Prezident Finlandyi prapanavaŭ zaprasić u Jeŭrasajuz Kanadu
Prezident Finlandyi Alaksandr Stub vykazaŭ mierkavańnie, što Jeŭrapiejskamu Sajuzu varta značna pašyrycca i ŭ budučyni abjadnać kala 40 dziaržaŭ. Na jaho dumku, heta dapamoža ES umacavać svaje pazicyi na mižnarodnaj arenie i stać bolš upłyvovaj siłaj u śviecie, piša CNBC.
Vystupajučy na enierhietyčnym forumie Eurelectric Power Summit u Chielsinki, Stub nazvaŭ krainy, jakija mahli b u pierśpiektyvie dałučycca da Jeŭrasajuza abo atrymać asabliva ciesnyja adnosiny ź im. Siarod ich — Vialikabrytanija, Kanada, Turcyja, Narviehija i Isłandyja.
Pavodle słoŭ finskaha lidara, ciapier isnuje spryjalny momant dla pašyreńnia ES, pakolki vajna va Ukrainie i źmieny ŭ palitycy ZŠA prymušajuć mnohija krainy pa-novamu aceńvać pieravahi supracoŭnictva ź Jeŭrapiejskim Sajuzam.
Asobna jon adznačyŭ, što Vialikabrytaniju, jakaja vyjšła ź ES u 2020 hodzie, varta znoŭ maksimalna nablizić da jeŭrapiejskaj supolnaści. Havoračy pra Kanadu, Stub žartam zaŭvažyŭ, što joj było b lepš stać 28‑m členam Jeŭrasajuza, čym uvajści ŭ skład Złučanych Štataŭ u jakaści 51‑ha štata, namiakajučy na niadaŭnija zajavy prezidenta ZŠA Donalda Trampa.
Finski prezident taksama zaklikaŭ nie zabyvacca pra Turcyju, jakaja ŭžo daŭno zastajecca kandydatam na ŭstupleńnie ŭ ES. Na jaho dumku, hetaja kraina maje vialikaje značeńnie dla biaśpieki Jeŭropy. Akramia taho, jon padkreśliŭ važnaść dalejšaj intehracyi krain Zachodnich Bałkan.
Siarod paŭnočnych dziaržaŭ Stub vyłučyŭ Isłandyju, dzie płanujecca refierendum pa pytańni pačatku pieramoŭ ab ustupleńni ŭ ES, a taksama Narviehiju, jakaja taksama pierahladaje svaje adnosiny ź Jeŭrapiejskim Sajuzam.
Razam z tym jon pryznaŭ, što pakul niama kankretnaha płana, jak i kali možna realizavać takuju maštabnuju ideju. Adnak, na jaho dumku, Jeŭropa pavinna myślić bolš šyroka i dziejničać bolš rašuča, kali choča zachavać svoj upłyŭ u śviecie.
Ciapier čytajuć
Dziadok raskazaŭ, jak pavodziŭ by siabie ŭ siońniašniaj Biełarusi i što budzie dalej5
Kamientary