«Prahresiŭnaja Bałharyja» ŭčystuju pieramahła na vybarach. Hienierał Radzieŭ supakojvaje: Praciahniem jeŭrapiejski šlach, ale krytyčna
Paśla piaci hadoŭ palityčnaha biazładździa, za čas jakich adbylisia 8 vybaraŭ zapar, bo palitykam nie ŭdavałasia sfarmavać stabilnaj kaalicyi, 19 krasavika ŭ Bałharyi vyznačyŭsia adnaznačny pieramožca. Levacentrysckaja, jeŭraskieptyčnaja i pamiarkoŭna rusafilskaja kaalicyja «Prahresiŭnaja Bałharyja» atrymaje absalutnuju bolšaść u parłamiencie.
Daterminovyja parłamienckija vybary ŭ Bałharyi całkam źmianili palityčny łandšaft u krainie. Apošnija piać hadoŭ usie ŭrady ŭ hetaj krainie abo byli trochpartyjnymi, abo nie mieli bolšaści ŭ parłamiencie. Na hety raz novastvorany levacentryscki błok «Prahresiŭnaja Bałharyja» atrymaŭ 45% hałasoŭ. Heta daść jamu kala 130 miescaŭ z 240 u Nacyjanalnym schodzie.
Dźvie pravacentrysckija partyi, adna bolš kansiervatyŭnaja i maje reputacyju karumpavanaj, druhaja libieralnaja i refarmisckaja, nabirajuć prykładna pa 13% hałasoŭ kožnaja. Jašče 7% — u centrysckaj partyi musulmanskaj mienšaści, a 4% — u prarasijskich ultranacyjanalistaŭ.
Novy ŭrad maje ŭznačalić lidar «Prahresiŭnaj Bałharyi» Rumien Radzieŭ. Jon nie ciomny konik u bałharskaj palitycy. Amal 10 hadoŭ, dva terminy, jon byŭ prezidentam krainy. Na hetuju pasadu jon pryjšoŭ z vojska, dzie daros da hienierał-majora avijacyi.
Paśla vybaraŭ Rumiena Radzieva žurnalisty spytali pra asnoŭnyja kirunki jaho budučaha ŭrada.
Voś što cytujuć bałharskija infarmacyjnyja ahienctvy. Na pytańnie žurnalista «Asašyejted pres» «Što aznačajuć vyniki hałasavańnia dla budučyni Bałharyi i jaje adnosin ź Jeŭrapiejskim sajuzam i Rasijaj», Radzieŭ adkazaŭ nastupnym čynam:
«Bałharyja prykładzie namahańni dla praciahu svajho jeŭrapiejskaha šlachu. Ale kab była mocnaja Bałharyja ŭ mocnaj Jeŭropie, nieabchodnyja krytyčnaje myśleńnie i prahmatyzm, bo Jeŭropa stała achviaraj ułasnaj ambicyi być maralnym lidaram u śviecie, jaki ciapier biez praviłaŭ. Tamu ciapier Jeŭropie sapraŭdy patrebnyja krytyčnaje myśleńnie, prahmatyčnyja dziejańni i dobryja vyniki, asabliva pry budaŭnictvie novaj architektury biaśpieki. Treba prykłaści surjoznyja namahańni i dla adnaŭleńnia svajoj industryjalnaj mocy i kankurentazdolnaści. Mienavita hetym Bałharyja ŭniasie najbolšy ŭkład u svaju jeŭrapiejskuju misiju».
Na pytańnie inšaha ŚMI «Što budzie pieršym, što vy zrobicie jak premjer-ministr?», lidar «Prahresiŭnaj Bałharyi» zajaviŭ, što pierad našaj krainaj stajać vielmi važnyja zadačy. Pieršaja — abrańnie novych členaŭ Vyšejšaj sudovaj rady, jakija, u svaju čarhu, pavinny pryznačyć nastupnaha hienieralnaha prakurora.
Jaho taksama spytali pra adnosiny z Rasijaj. U suviazi z hetym jon skazaŭ, što jany pavinny hruntavacca na ŭzajemnaj pavazie, a bałhary pavinny pavažać svaju historyju i, u pryvatnaści, rolu Rasii ŭ našym vyzvaleńni.
«A sučasnyja adnosiny pavinny hruntavacca na praktyčnym padychodzie, asabliva ŭ tym, što tyčycca ekanomiki i biaśpieki. Vieru, što buduć zrobleny kroki adnosna suviaziaŭ pamiž Jeŭropaj i Rasijaj na asnovie pahadnieńnia ab biaśpiecy. Heta nadzvyčaj važna dla našaj budučyni», — zaklučyŭ Radzieŭ.
«Spytajcie prezidenta Francyi Makrona, spytajcie premjer-ministra Bielhii, kanclera Mierca i inšych lidaraŭ, jakija skazali, što dyjałoh pavinien viarnucca. Jeŭropa pavinna dumać, jak jana budzie harantavać sabie resursy, bo biez enierhietyčnych resursaŭ nie moža być kankurentazdolnaści», — zajaviŭ lidar «Prahresiŭnaj Bałharyi».
Paśla hetaha prylacieła reakcyja z boku Maskvy. «Biezumoŭna, słovy i spadara Radzieva, i niekatorych inšych jeŭrapiejskich lidaraŭ ab hatoŭnaści vyrašać prablemy praz prahmatyčny dyjałoh z Rasijskaj Fiederacyjaj usprymajucca nami stanoŭča», — skazaŭ pres-sakratar Kramla Dźmitryj Piaskoŭ. I ŭdakładniŭ, što jašče rana havaryć pra prykmiety źmienaŭ u ahulnajeŭrapiejskich nastrojach u dačynieńni da Rasii, adkazvajučy na pytańnie, ci adkryje pieramoha Radzieva ŭ Bałharyi i inšyja padziei mahčymaść dla «paciapleńnia» ŭ rasijska-jeŭrapiejskich dačynieńniach.
Bałharyja ź jaje 6, 5‑miljonnym nasielnictvam, pieražyła mocny ekanamičny spad i ŭsplosk karupcyi ŭ 1990—2000-ch, ale jana za apošniaje dziesiacihodździe zaznała dobryja tempy ekanamičnaha rostu. Jana ŭsio jašče zastajecca samaj biednaj u Jeŭrasajuzie, ale i pa VUP na dušu nasielnictva ŭ parytecie pakupnickaj zdolnaści, i pa siarednich zarobkach užo abyšła Biełaruś. Z 1 studzienia 2026 hoda Bałharyja pierajšła na jeŭra.
Kamientary
Jak babarykanskaja partyja Vmiestie.