Užo tradycyjny fiestyval Tutaka prachodzić ciaham čatyroch dzion — z 16 pa 19 lipienia — va ŭročyščy Boryk na Padlaššy ŭ Polščy. Prachodzić jon šosty raz, piša Radyjo Svaboda.
16 lipienia na fiestyval pačali pryjazdžać pieršyja ŭdzielniki.
Asnoŭnaja prahrama startuje ŭ piatnicu, 17 lipienia. Upieršyniu sioleta ŭvachod na fiestyval staŭ płatnym: kali ŭ papiarednija hady jon byŭ biaspłatny, ciapier kvitok dla darosłaha kaštuje 150 złotych (kala 35 jeŭra).
Na scenie vystupić biełaruskamoŭny rok-hurt RIMA z padlaskaha Haradka, jaki letaś viarnuŭsia paśla 13‑hadovaha pierapynku.
Taksama ŭdzieł u muzyčnaj prahramie voźmuć repier Vinsent, Anastasija Rydleŭskaja, hurty Dzieciuki, B:N:, «Biaz nazvy» i «Raźbitaje serca pacana».
U prahramie — niefarmalnyja sustrečy sa Śviatłanaj Cichanoŭskaj, Paŭłam Sieviaryncam, Maksimam Znakam i muzykami fiestyvalu. Taksama pakažuć film «Pad šerym niebam» režysiorki Mary Tamkovič, natchniony historyjaj palitviaźniaŭ — žurnalistaŭ Kaciaryny Andrejevaj i Ihara Iljaša.
Dla amataraŭ chendmejdu arhanizujuć majstar-kłasy pa vyrabie tradycyjnaj lalki-žadanicy i sałamianych konikaŭ, a taksama rośpisie šopieraŭ i draŭlanych zakładak. Muzyka Volha Baryšnikava praviadzie majstar-kłas pa biełaruskich prypieŭkach.
Psichaterapieŭtka Hanna Matulak praviadzie razmovu pra stratu, traŭmu i adnaŭleńnie, a pravasłaŭny śviatar Alaksandr Kuchta — pra miesca Biełarusi ŭ pravasłaŭnym śviecie i suviaź relihii z palitykaj.
Žadajučyja zmohuć prysutničać na adkrytym zapisie padkasta «Kałasy pad siarpom ŠI».
Fiłosaf Uładzimir Mackievič raskaža pra mietadałahičnuju hulniu, jakaja hetaj viasnoj sabrała pradstaŭnikoŭ biełaruskich demakratyčnych sił i palityčnych struktur. Kaciaryna Vadanosava pradstavić lekcyju pra modu časoŭ Kastusia Kalinoŭskaha, a kłub histaryčnaj rekanstrukcyi Invictus 1863 prademanstruje muštru kasinieraŭ.
Biełaruskija vydaŭcy abmiarkujuć, jak knihavydańnie vyžyvaje paśla 2020 hoda. Pry hetym sioleta, u adroźnieńnie ad papiarednich hadoŭ, na fiestyvalnym kirmašy nie budzie knižnych namiotaŭ.
Taksama na Tutaka adbudziecca druhi futbolny turnir pamiaci mastaka Alesia Puškina.
Heta tolki častka zapłanavanych mierapryjemstvaŭ fiestyvalu.
Poŭnuju prahramu možna pahladzieć tut.
Arhanizataram Tutaka źjaŭlajecca adnajmiennaja fundacyja.
Ciapier čytajuć
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?1414
Kamientary
150 zł. heta ŭvachod. Ale ž treba jašče miesca na pałatačny ŭziać? +100 zł. A dabracca? Z Varšavy - jašče minimum +100 zł. Atrymlivajecca minimalna sto dalaraŭ, tolki kab mieć mahčymaść tam prysutničać, nie ŭličvajučy nabyćcio na miescy ježy
Pa što? Kab pasłuchać Vinsenta, jaki raz u piać hadoŭ niešta vydaje? Pry ŭsioj pavazie, ale tak nie pracuje
I pry hetym arhanizatary dajuć viasnoj intervju z tezisam, što nie płaciać vykanaŭcam, a ŭ samoha mierapryjemstva chapaje sponsaraŭ i hrantaŭ - prynamsi kali pahladzieć na łoha. Markietynh na nizkim uzroŭni, rekłamy i SMM narmalnych niama, scenu źbirajuć vałanciory, šmat što ŭvohule na vałanciorach trymajecca...
Mnie padabajecca Tutaka, ale nie bjecca trochi matematyka ŭ mianie